Chikwata cheZimbabwe chiri kunomirira nyika kumakundano eAll Africa Games chakawonekana neveruzhinji neChishanu manheru chamirira kusimuka chakananga kuAccra, Ghana, uko chiri kutarisira kunokohwa mamenduru akawanda.
Chikwata ichi chakaitirwa mabiko nehurumende muHarare neChishanu chisati chasimuka nemusi weChitatu svondo rinouya.
Vatambi nevarairidzi vakaunganidzwa ava vanosvika ivo makumi masere nevapfumbamwe.
Makundano eAll Africa Games ari kutanga neChishanu 8 Kurume achipera musi wa 30 Kurume.
Mutambi wechesi, Zhemba Jemuse, uyo ari pachinhanho chegumi nenhanhatu pasi rese, anoti ari kuona menduru yegoridhe chete mumasizo ake.
"Semakore ese, ndinozivakanwa nema gold medals. Ndodzoka negold medal," anodaro Jemusi.
Ukuwo, mumhanyi wemijaho mipfupi, Bradley Makuvire, anoti haasi kuvimbisa zvakawandisa asi kufadza ruzhinji rweZimbabwe.
"Ndiri kutarisira kuwanika mufainari ye 400 metre hurdles. Pamusoro pezvo ndiri kuda kubatsira kutora goridhe mu 400 takabatana," adaro Makuvire.
Asi mutambi wemutambo we rugby, Carlos Matematema, anoti ari kufara nekusarudzwa kumiririra nyika achiti iye chinangwa chavo imenduru yegoridhe chete.
"Ndofunga tichadzoka nezvakakwana. Tashanda zvakanyanyisa zvinoda gold," adaro Matematema.
Zimbabwe iri kushandisa zvekare makundano eAll Africa Games aya kugadzirira makwikwi e Olympic Games ayo ari kuitirwa muParis, France, muna Chikumi wegore rino.
Murairidzi wemutambo we judo, Simbarashe Mashaya, anoti vatambi vake vari kugadzirira zvakasimba vari kunze kwenyika.
Vachitaura pamabiko ekuonekana nevatambi aya, gurukota rezvemitambo, Muzvare Kirsty Coventry, vakati hurumende ndiyo iri kubata zvose kubva kumbatya dzemitambo kusvika pekugara.
Makundano eAll Africa Games akamboitirwa muZimbabwe muna 1995 apo nhandare dzemunyika dzakange dzichiri dzakanaka, kwete zvadzaita pari zvino apo dzangoti ngondongondo nekusabatwa zvakanaka.
Makundano aya anoitwa mushure memakore mana ega ega, uye akapedzisira kuitwa muna Nyamavhuvhu 2019 kuRabat kuMorocco, akazombosendekwa muna 2023 nekutyirwa kupararira kwechirwere che Covid 19.
Forum