Mitambo yeCastle Lager Premier Soccer League ichange yakaita fararira kumativi mana ese enyika kunyange hazvo Zimbabwe yakadzingwa munhabvu yepasi rese neFIFA.
Kubva kuHarare kusvika kuBulawayo nekuZvishavane mitambo yeCastle Lager Premier Soccer League iri kuenderera mberi kunyange hazvo Zimbabwe yakadzingwa munhabvu yepasi rese.
Manica Diamonds iyo iri kutungamira makundano aya ichange iri munzira kubva kwaMutare yakananga kuMhondoro-Ngezi kunosangano neYadah muBaobab Stadium mangwana.
Zvakamira zvakadai, Dynamos iri kusimukawo muHarare kuenda kuBulawayo uko iri kunokweshana neBulawayo Chiefs, iyo iri kumbobaka moto yodzima zvekare.
Asi murairidzi wechikwata cheHerentals, Kumbirai Mutiwekuziva, ari kukumbira vateveri vechikwata chake kuti vauye muNational Sports Stadium nehuwandu hwavo mangwana kuzobatsira kukunda Bulawayo City.
Mutiwekuziva anoti haasi kutarisa kuti Bulawayo City iri papi muhurongwa hwePSL asi matambiro echikwata chake.
Harare City ine mutambo neFC Platinum kuZvishavane, mutambo
uyo munyori wezvemitambo Tedius Manyepo anoti “Kugona Kunenge Kudada” inokunda.
Asi Chicken Inn, iyo iri pachinhanho chechipiri, iri kutarisira mapoinzi ese matatu pamutambo wayo neZPC Kariba muLuveve Stadium nesvondo zvekare musi mumwechete apo Triangle neNgezi, idzo dzakasonana, dziri kusanganawo zvekare.
Mimwe mitambo iriko yakamira seizvi …
NeSvondo
Caps United vs Hwahwa - NSS
Cranbourne Bullets vs Black Rhinos —Baobab
Tenax vs Highlanders- Sakubva
Pari zvino, Manica Diamonds ndiyo iri pamusoro petafura yePSL nezvibodzwa asi yakaenzana pamapoinzi gumi nemaviri neChicken Inn.
Asi chikwata chichatora mukombe uyu hachikwanise kutamba muCAF Champions League mushure mekudzingwa kwezvikwata zvemuno mumakundano eCAF neeFIFA, kunze kwekunge gakava riri muZIFA ragadziriswa nenzira dzinotambirwa neFIFA.
Facebook Forum