Bato rinopikisa reCitizens Coalition for Change riri kupomera Zanu-PF mhosva yekupamba nekurwisa nhengo dzaro kuMashonaland East, Midlands neMasvingo.
Mutevedzeri wemutauriri webato reCitizens Coalition for Change VaOstallos Siziba vaudza Studio 7 kuti vamborwiswa kuWedza nhasi nevatsigiri vebato reZanu-PF vanodarika zana nemakumi mashanu avo vange vakavhara mugwagwa.
Vachinyora padandemutande ravo reTwitter, VaSiziba vatiwo imwe nhengo yebato ravo VaTonderai Bhuka vapambwa nevatsigiri veZanu-PF ava paGMB Wedza.
Nezuro mutauriri weTripple C Muzvare Fadzayi Mahere vakanyorawo padandemutande reTwitter kuti vatsigiri vebato ravo vakarwiswa kuUzumba mushure mekunge mutungamiri webato iri VaNelson Chamisa vaita musangano munzvimbo iyi.
KuGokwe nezuro kunonziwo kwakaitika mhirizhonga apo vatsigiri veTripple C vashanu vakati vakarohwa nevanofungidzirwa kuti vatsigiri veZanu-PF apo vaitsvagira rutsigiri musarudzo dzemaby elections nhengo yebato ravo VaCostain Muguti dzavanenge achitatsurana naVaSpencer Tshuma veZanu PF kuGokwe Kabuyuni musi weMugovera.
Vakafanobata chigaro chasachigaro weCCC kuMidlands, VaJosiah Makombe vati nhengo dzavo dzakarohwa zvakaipisisa.
Asi sachigaro weZanu PF kuMidlands, VaLarry Mavhima vati havakwanisi kutipa divi ravo sezvo vange vari pamusangano wekutsvaga rutsigiro VaTshuma.
KwaGutu vatsigiri veCCC vechidiki vanonzi vakatiza misha yavo uye vave kugara mumakomo mushure mekuvingwa padzimba dzavo kuward 7, kuminda mirefu yekwaBhuka vachinzi vaifamba vachikurudzira vanhu kuti vanyorese kuvhota
Mumwe wenhengo dzeCCC akavingwa pamusha pake nevanofungidzirwa kuti vatsigiri veZanu PF vaiimba nziyo pamwe nesirogani yekuti mutengesi , VaEphraim Morudu vanoti vakatomhan’ara nyaya iyi kumapurisa ekwaMpandawana.
Vatsigiri vave kugara mugomo vanosanganisira VaDavid Mahachi, Solomon Hungwe, Farai Mahachi, Takudzwa Dube, Farai Manyanga, Patrick Muchekeri nevamwe vasina kudomwa.
Sachigaro we Zanu PF muMasvingo, VaRobson Mavhenyengwa vati havasati vanzwa nezvenyay iyi asi vati bato ravo hairite zvemhirizhonga.
Mukuru mubazi rezvekuburitswa kwemashoko muZanu PF VaTafadzwa Mugwadi varambawo mashoko ekuti bato ravo riri kuita mhirizhonga. Mutauriri wemapurisa munyika Assistant Commissioner Paul Nyathi vati hasati vanzwa nyaya dzemhirizhonga dzakamhan’arwa kubasa kwavo.
Asi veCCC vanoti kunyange vakamhangara nyaya idzi kumapurisa vatsigiri veZanU PF havasungwi.
Semuenzaniso gweta rinorwira kodzero dzevanhu Amai Beatrice Mtetwa vakamhan’ara kumapurisa nyaya yenhengo yeZanu-PF VaAbton Mashayanyika vakabuda pavhidhiyo vachiti mutungamiri webato reTripple C VaChamisa, mhuri yavo nevatsigiri vavo vapondwe asi havana kusungwa.
Mapurisa akavimbisa kuferefeta nyaya iyi musi wa 27 Chikunguru asi VaMashayayika havasati vasungwa.
Facebook Forum