Mamwe masangano anomiririra vashandi vehurumende anoti haasi kufara nedanhho riri kuda kutora hurumende rekubhadhara mari yemabhonasi vachishandisa ongororo yekuti mushandi ayishanda zvakadii gore rino zvichaita kuti vashandi ava vapihwe mari dzemabhonasi dzakasiyana.
Mugwaro rakanyorwa nemunyori mukuru mubazi rezvehutano, Air Commodore Jasper Chimedza, hurumende inoti ichabhadhara vashandi vayo mari dzemabhonasi zvichienderana nekuti mushandi akashanda sei kana kuti performance appraisal asi vashandi vehurumende vanoti izvi hazvina
musoro sezvo vagara vachitambira mari dzakafanana.
Mutauriri webazi rezvehutano VaDonald Mujiri vabvuma kuti gwaro riri kutenderera pamadandemutande rakanyorwa naDr Chimedza uye mashoko arimo vakaapihwa nePublic Service commission.
Patavabvunza kuti zvinokwanisika here ipo pasina nguva yekuita magwaro anoratidza mashandiro ayiita mushandi, VaMujiri vati iri harisi dambudziko sezvo zvichigara zvichitwa makore ose kunyange zvainge zvisingashandiswe pakupihwa kwemari dzemabhonasi.
Mutauriri wevashandi vemubazi rezvehutano reZimbabwe Nurses Association -ZINA- VaEnock Dondo vanoti sangano ravo harisi kutambira zviri mugwaro iri vachiti vashandi vose vari kutarisira mari yebhonasi semakore ose. VaDongo vanoti kupesana nehurongwa hweperformance appraisal.
Mutauriri werimwe sangano rinomiririra vadzidzisi reZimbabwe Teachers Association kana kuti ZIMTA VaGoodwill Taderera vanoti hurumende yave kuda kudududza pane zvavakavimbisa pamusangano weNational Joint Negotiatting Forum-NJNF-wekuti vashandi vachapihwa mari dzemabhonasi
semakore ose.
Sachigaro werimwe sangano rinomiririra vadzidzisi reAmalgamated Rural Teachers Union of Zimbabwe-ARTUZ-VaObert Masaraure vanoti kupa mari dzemabhonasi mushure mewongororo yemashandiro akaita mushandi gore rose kuda kupatsanura vashandi zvine hutsinye mukati uye kutyora
kodzero dzevashandi.
Mukuru anoona nezvetsvakurudzo kana kuti research murimwe sangano rinomiririra vadzidzisi reProggressive Teachers Union of Zimbabwe – PTUZ-VaJosiphhat Gwenzira vanoti hurumende inenge iri kuda kutsikirira vamwe vashandi.
Hatina kunzwa divi rehurumende sezvo gurukota rezvemari Muzvinafund Mthuli Ncube kana gurukota rezvevashandi Muzvinafundo Paul mavima vari kunzi vari kunze kwenyika vange vasiri kudaira nharembozha dzavo.
Facebook Forum