Vatsigiri vemutambo wenhabvu muZimbabwe vane chivimbo kuti Morocco inorova France manheru ano nekupinda mufainari ye2022 World Cup.
Nhasi kune makuwerere pakati pechikwata cheMorocco icho chiri kushura mare kuWorld Cup nechikwata chakapedzisira kutora mukombe uyu cheFrance.
Veruzhinji munyika kusanganisira muongorori wemutambo wenhabvu VaLawrence Hwekwete vane chivimbo kuti Morocco inokunda France mumutambo uyu.
Chikwata chinokuda apa chiri kusangana neArgentina iyo yakarova Croatia 3-0 nezvibodzwa zvakanwiswa naLionel Messi nezviviri naJulian Alvarez. Mukunwisa nezuro, Messi ave nezvibodzwa zvakaenzana mumakwikwi aya naKylian Mbappe wekuFrance.
Vaviri ava vanwisa zvibodzwa zvishanu. Argentina yakapedzisira kusimudza mukombe uyu muna 1986 ichitingamirwa namushakavu Diego Maradona kuMexico.
Mbappe ari kupinda munhandare manheru ano mumutambo wakatarisirwa zvikuru nevakawanda neMorocco. Mutambo uyu uri kutambirwa munhandare yeAl Bayt Stadium. Kunze kwaMbappe, maAtlas Lions anofanira kungwarirawo Olivier Giroud uyo ari kurovawo mambure.
Asi Morocco iri kurumbidzwa nenyanzvi nekuti yakasunga kumashure neutare zviri kupa kuti nyika dzakawanda dzikundikane kuinwisa.
Murairidzi weMoroccco, Walid Regragui ari kurumbidzwa nevakawanda nemarongero ake etsoro yemutambo zvapa kuti ave murairidzi wekutanga kutungamira nyika yemuAfrica kusvika kumazemi-finals eWorld Cup. Morocco iri kutarisira kuna Hakim Ziyech, Achraf Hakimi nevamwe.
Muongorori wemutambo wenhabvu VaFarai Kambamura vanoti varikuonawo Morocco ichibudirira mumutambo uyu.
Vanoita zvematongerwo enyika VaNixon Nyikadzino avo vanozivikanwa nezita rekuti Cde Mao vanoti Morocco ndizvo.
Chikwata chinokundwa nhasi pakati peFrance neMorocco hachisi kubva chadzokera kumusha asi chichatamba neCroatia nemusi weMugovera kuona kuti ndeipi nyika inopedza makundano aya iri pachidanho chechitatu. Fainari yeWorld Cup 2022 iriko musi wesvondo, 18 Zvita.
Facebook Forum