Mumiriri weZengeza West mudare reparamende, VaJob Sikhala, vanonzi varwara zvakaipisisa vari kujeri zvaita kuti kutongwa kwenyaya yavo yekunzi vakavhiringidza mafambisirwo enyaya mumatare zvichitevera kupambwa nekuzopondwa kwenhengo yebato ravo reCitizens Coalition for Change, Muzvare Moreblessing Ali, kutadze kuenderera mberi nhasi.
VaSikhala havana kuuya kudare nhasi vachinzi varwara zvakaipisisa kujeri reChikurubi Maximum Security Prison uko kwavari kuchengeterwa kubva zvavakasungwa gore rapera.
Vanoshanda kunochengetwa vasungwa avo vasina kuda kudomwa nemazita vati VaSikhala vatadza kukwira mumotokari inotakura vasungwa nekusanzwa zvakanaka kwavari kuita uku.
Rimwe remagweta avo, VaHarrison Nkomo, vati vave kutoita chipatapata kuona kuti VaSikhala vaonekwe nanachiremba.
VaNkomo vati vari kushushikana zvikuru kuti matare ari kuramba achinyima VaSikhala mukana wekubvisa mari yechibatiso pakatariswawo nyaya yekuti VaSikhala pachavo igweta rinoshanda mumatare umu pamwe nekurwara kwavari kuita vari muhusungwa.
VaSikhala vakaisa zvikumbiro gumi nezviviri zvekuti vapihwe mukana wekubvisa mari yechibatiso asi pose pavakaenda kudare ramejasitiriti nekudare repamusoro vainyimwa mukana uyu.
VaSikhala vakamboonekwa nananchiremba vavo pamwe nanachiremba vehurumende vari kujeri kwakare masvondo mashoma adarika.
Hatina kukwanisa kutaura nemutauriri weZimbabwe Prisons and Correctional Services, Muzvare Meya Khanyezi, kuti tinzwe kuti VaSikhala vakwanisa kuonekwa nanachiremba here nekurwara kwavaita sezvo vanga vasiri kudaira nharembozha yavo.
VaSikhala vakasungwa gore rapera vachipomerwa mhosva yekuda kupesvedzera mhirizhonga zvichitevera kupambwa nekuzopondwa kwakaitwa Muzvare Ali nevanofungidzirwa kuti inhengo yeZanu PF, VaPius Jamba Mukandi, avo vakatobvuma mhosva iyi mudare redzimhosva.
Vave muhusungwa vakazopomerwawo zvakare imwe mhosva yekuvhiringidza mapurisa kuferefeta nyaya mumatare kubudikidza nemashoko avanonzi vakataura ane chekuita nekupambwa nekuzopondwa kwaMuzvare Ali iyo yanga ichifanira kunzwikwa nhasi.
Pamusoro penyaya mbiri idzi, VaSikhala vari pakati pekutongwa neimwe nyaya yekunzi vakakurudzira veruzhinji kuti varatidzire zvine mhirizhonga mukati muna Chikunguru 2021 zvichitevera kuratidzira kwakanga kwashevedzerwa nesangano reJuly 31st Movement iro rinotungamirwa naVaJacob Ngarivhume.
Kuratidzira uku kwakazotadza kubudirira mushure mekusungwa kwaVaNgarivhume nevamwe. Masangano anorwira kodzero dzevanhu anoti kuratidzira murunyararo kunobvumirwa pasi pebumbiro remitemo yenyika.
Facebook Forum