Chikwata cheFC Platinum chavhura mwaka wenhabvu wegore rino zvakanaka mushure mekusimudza mukombe weCastle Challenge wakatambirwa muMandava Stadium nhasi masikati.
FC Platinum yarova Bulawayo Chiefs 2-0 ndokutora mukombe unokosha uyu uyo unovhura makundano emwaka gore rega rega.
Chikwata ichi chasimbisa humhizha hwacho hwenhabvu mushure mekutora mukombe weligi kanokwana kana kakateverana.
FC Platinum ndiyo yakatora mukombe weligi mushure mekupedza iine mapoinzi mapfumbamwe pamusoro peChicken Inn.
Mutsigiri wenhabvu VaLameck Jekopu vanoti zvanga zviri pachena kuti chikwata chaNorman Mapeza ichi chinotora mukombe weCastle Challenge uyu.
Vatsigiri venhabvu vanga vakazara munhandare iyi mushure mekudzikiswa kwemari yekuripira kupinda munhandare kubva pamadhora matatu kuenda pamadhora maviri.
Nhengo yekomiti inotungamira vatsigiri venhabvu veZimbabwe National Soccer Supporters Association, VaWonder Gombera, vanoti Premier Soccer League, kana kuti PSL, haifanire kugumira pamutambo uyu chete asi kudzikisawo zvekare mari pamitambo yeligi.
Mukombe weCastle Challenge Cup ndiwo nhungamiri kumakundano enhabvu emwaka uno ayo ari kutanga svondo rinouya.
Mukombe uyu unosangana Chikwata chinenge chatora mukombe we ligi nechikwata chinenge chasimudza mukombe we chibuku Super Cup, uyo wakasimudzwa neBulawayo Chiefs mushure mekurova Herentals 1-0.
Kunyange hazvo vachitsigira Dynamos, VaOliver Musongoro vanoti havasi kuona chikwata chavo chichimiramira gore rino.
Dynamos iri kuvhura musangano nerwendo kuHwange musi uyo FC Platinum iri kusangana neSimba Bhora.
Facebook Forum