Chizvarwa Zimbabwe chinoita zvemafirimu Muzvare Nyari Mashayamombe avo vanotungamira sangano reIdentities Media TV vanoti vari kufara nekutambirwa kuri kuitwa firimu ravo rekutanga rinonzi “Even Our Dreams” iro vari kufamba vachiratidzira muAmerica. Firimu iri rinotaura nezvevanhu vakaremara, matambudziko avo nezvavanoshuvira.
Vanoti vari kutsvagawo vekushanda navo muAmerica uye kubatsira vakaremara kuC hiredzi. Ikozvino vari kuWinsconsin kwavari kuratidza firimu ravo kuzvikoro zvepamusoro soro.
Muzvare Mashayamombe vanoti firimu iri rakaitwa kunzvimbo yeChiredzi uko vari kushanda nevanorarama nehurema. Vanoti vari kutarisira kuti vachawana rutsigiro rwekuti vawane zvikwanisiro zvichashandiswa nevanhu vemunzvimbo iyi.
Vanoti zvekutora mafirimu vakazvitanga kuitira kuti vawane nzira yekurondedzera zviri kusangana neveruzhinji munyika uye vakawana zvakakodzera kuti vatange nekupa nhoroondo yevanorarama nehurema.
Muzvare Mashayamombe vanoshanda zvakare semurwiri wekodzero dze vanasikana nemadzimai pasi pesangano reTag a Life International - TALI.
"Shuwiro yangu ndeyekuti ndikwanise kuwana rutsigiro rwekuti ndiwane zvikwanisiro zvichashandiswa nevanorarama nehurema vari kuChiredzi nedzimwe nzvimbo. Asi ndichatanga nekuChiredzi sezvo kuriko kwandakaitira firimu rangu," Muzvare Mashayamombe vaudza Studio7.
Vanoti vakakwanisa kuratidza firimu ravo kuMaryland muAmerica svondo rapera rikatambirwa zvakanaka.
"Ndiri kutarisira kuti kana ndadzokera kuZimbabwe ndicharatidza firimu iri kunzvimbo dzakawanda kuti veruzhinji vawane dzidziso pamusoro pezvino sangana nevanorarama nehurema,"Muzvare Mashayamombe vaenderera mberi vachiudza Studio7.
Vanoti vari kushandisa zvakare nzira dzechizvino zvino mukufambisa firimu ravo kuti rionekwe nevanhu vazhinji.
Facebook Forum