Dare repamusoro reHigh Court muPretoria, South Africa nhasi ratanga kunzwa nyaya yekukanzurwa kwemapepa eZimbabwe Exemption Permit anopa zvizvarwa zveZimbabwe mvumo yekushanda zviri pamutemo muSouth Africa.
Vaendeswa kudare igurukota gurukota rezvemukati menyika yeSouth Africa VaAaron Mostoaledi vari kupomerwa mhosva yekutyora mutemo apo vakati magwaro akapihwa zvizvarwa zeZimbabwe amire kushanda musi wa 30 Chikumi.
Izvi zvikaitwa, zvizvarwa zveZimbabwe zviuru zana nemakumi manomwe memasere kana kuti 178 000 zvinenge zvomanikidzwa kudzokera kumusha.
Asi gweta eHellen Suzman Foundation kana kuti HSF Advocate Steven Budlender vari kumiririra zvizvarwa zveZimbabwe vati zviri kutaurwa nehurumende yeSouth Africa zvekuti zvinhu zvanaka muZimbabwe handichokwadi sezvo hupfumi huri kutatarika uye hurumende ichipomerwa mhosva yekuita vanhu kafiramberi zvikuru munguva yesarudzo.
Zimbabwe ine sarudzowo gore rino zvapa kuti magweta eHellen Suzman Foundation ati kuendesa vanhu kwavakabva kuvakanda mukanwa mamupere.
Hurumende yeSouth Africa mumapepa kudare yange yati komisheni yakatungamirwa nevaive mutungamiri wenyika iyi VaKgalema Motlanhe mushure mekunge masoja apomerwa mhosva yekupfura nekuuraya vanhu vairatidzira muHarare pakapera sarudzo dza2018 inoratidza kuzvipira kweZimbabwe kugadzirisa matambudziko ekutyorwa kwekodzero dzevanhu.
VaBudlender vati zvakanzi zviitwe negwaro raVaMothlante hazvina kana chimwe chete chakagadziriswa nehurumende yeZimbabwe.
VaMotsoaledi vapomerwawo mhosva yekungotora danho ravo vasina kusumawo zvizvarwa zveZimbabwe. Asi ivo VaMotsoaledi vari kuti vane mvumo yekumisa kushanda kwemagwaro eZEP nekuti haana kunzi anoshanda kusvika naririni. Vanotiwo zvizvarwa zvenyika yavo hazvina mabasa.
Asi magweta eHSF ati ongororo yakaitwa neWorld Bank inoratidza kuti vekunze vari kutobatsira kuti vanhu vemuSouth Africa vawane mabasa. Vamwe vapinda mudare vachida kuti magwaro aya abviswe ndeveAll truck Drivers Forum vaudza dare kuti zvakaitwa nehurumende yavo zvekupa zvizvarwa zveZimbabwe aya magwaro hazvisi pamutemo vakati vanhu ava ngavadzokere kunyika yavo.
Gweta vari sachigaro we sangano rinorwira kodzero dzezvizvarwa zvekunze mu South Africa, Dr Vusumuzi Sibanda vaudza Studio 7 kuti pane mukana wekuti kumiswa kwe nagwaro e ma ZEP aya kunogona kunzi kunze kwemutemo uyewo vati hurumende ye Zimbabwe haina chayati yataridza kuti irikuita sezvakaziviswa ne muzinda wayo mu South Africa kuti ichabatsira zvizvarwa zve Zimbabwe zviri mudambudziko iri.
Facebook Forum