Gurukota rinoona nezvekudyidzana nedzimwe nyika muAmerica VaAntony Blinken vatumira mashoko ekukorokotedza mhuri yeZimbabwe pazuva ranhasi rekuwana kuzvitonga kuzere. Vati America ichamira nevana veZimbabwe semakore ose.
Vatiwo Zimbabwe ine mukana wekuti itange kutevera gwara regutsaruzhinji nehutongo hwejekerere pasina kumbunyikidza zvizvarwa zvayo.
America yakatemera mutungamiri wenyika VaEmmerson Mnangagwa nevamwe muhurumende yavo zvirango ichivapomera mhosva yekutonga nedemo. Zimbabwe inoti zvirango izvi ndizvo zvaondonga hupfumi hwenyika.
Asi America inoti kutonga nedemo nehuwori ndizvo zvapa kuti Zimbabwe ibatirire iri kumawere nenzwara. Nyanzvi munyaya dzezematongerwo enyika Doctor Devine Mafa avo vakavamba sangano reZimbabwe Economic Forum vaudza Studio 7 kuti mashoko aVaBlinken anoratidza kuti America inoda kudyidzana neZimbabwe asi iine hutongo hwejekerere.
Facebook Forum