VaChamisa Voenda Kunosanga neVatungamiri veSADC neAU Pamberi Pesarudzo

Mutungamiri webato guru rinopikisa reCitizens Coalition for Change, VaNelson Chamisa, vari kutarisirwa kuita rwendo rwekunosangana nevatungamiri venyika dziri dzegungano rekuchamhembe kweAfrica reSADC pamwe neAfrican Union nechinangwa chekuedza kuti masangano aya abatsire mukugadzirisa matambudziko akatarisana nenyika pamberi pesarudzo dzegore rino.

VaChamisa vanonzi vakatarisirwa kutungamira chikwata chebato ravo mumazuva mashoma ari kutevera chichanosangana nehutungamiri hweSADC pamwe neAfrican Union vachitsvaga nzira dzekuti masangano aya angabatsira sei kugadzirisa zviri kunetsa munyika pamberi pesarudzo.

Vachitaura nevatori venhau muHarare nhasi, mutevedzeri wemutauriri weCCC, VaGift Ostallos Siziba, vati nyaya dzavachasimudza kuSADC neAU dzinosanganisira kusamira zvakanaka kwenyaya dzezvehupfumi, zvematongerwo enyika pamwe nenyaya dzinobata nyaya dzesarudzo.

Asi vanokokera nhengo dzeZanu PF muaparamende, VaPupurai Togarepi, vati VaChamisa nebato ravo havafanire kuita bembera vachienda kunze kwenyika vasina kutsvaga nzira dzekugadzirisa zvavanoti zviri kunetsa vari muno munyika.

Nyanzvi munyaya dzezvematongerwo enyika uye vachishanda nesangano reZimbabwe Democracy Institute, VaBekezela Gumbo, vati rwendo urwu rwakakosha zvikuru sezvo bato reZanu PF richipomerwa mhirizhonga kunyanya munguva dzesarudzo vachiti hazvingaite kuti mapato anopikisa aponderwe musaga anyerere.

Vane ruzivo nezverwendo rwaVaChamisa nechikwata chavo vanoti dzimwe nyaya dzichasimudzira pamisangano yavachaita nevatungamiri vemuSADC neAU dzinosanganisira kurambidzwa kwemisangano yebato, huori, pamwe nekushungurudzwa kwavanoti kuri kuitwa mumiriri weZengeza West muparamende, VaJob Sikhala, avo vave kuda kusvitsa gore vari mujeri vachipomerwa nyaya dzine chekuita nezvematongerwo enyika.

VaTogarepi vati nyaya yaVaSikhala inyaya isingafanire kupindirwa nemamwe mapandiko ehurumende sezvo vachiti vematare anoshanda akazvimirira.

VaSiziba vatiwo dzimwe nhengo dzebato ravo dzakadomwa mazita adzo pakati pevachazokwikwidza vakamirira bato ravo musarudzo dziri kuuya dziri kushungurudzwa nevari kufungidzirwa kuti vatsigiri veZanu-PF.

Asi VaTogarepi vati zviri kutaurwa neCCC izvi inzira dzekutsvaga kusvibisa zita rehurumende yaVaEmmerson Mnangagwa.

Bato reCCC riri kuchema chemawo kuti harina kupihwa gwaro revavhoti kunyangwe sarudzo dzave kusvika pedyo.

Mutungamiri wenyika VaEmmerson Mnangagwa vari kutarisirwa kutara zuva iri mushure mekunge dare repamusoro soro reConstitutional Court ratara mutongo waro panyaya yakakwidzwa kudare iri nebato rinopikisa reMDC yekuti ZEC yakaresva pakuganhura matunhu kuitira sarudzo kana kuti delimitation.

Embed share

Nyaya Ina Frank Chikowore

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:05:41 0:00

Pekupinda Napo Kuti Muone Zvamuri Kuda

• 16 kbps | MP3
• 32 kbps | MP3
• 48 kbps | MP3

Pop-out player