Mutungamiriri webato rinopikisa reTransform Zimbabwe Party, VaJacob Ngarizvhume nhasi vawanikwa vaine mhosva yekupesvedzera mhirizhonga nedare ramajisitireti muHarare uye vachapihwa mutongo wavo mangwana.
VaNgarivhume vanonzi vakanyora padandemutande ravo reTwitter muna2020 vachirukurudzira veruzhinji kuti vaite mhirizhonga vachiratidzira pamusoro pehuwori uhwo vaiti hwatekeshera munyika.
Mutongi wedare, Amai Feresi Chakanyuka, vati kunyange hazvo VaNgarivhume vairamba mhosva iyi dare raona zviri pachena kuti mashoko avo aikurudzira mhirizhonga zviri pachena. Gweta raVaNgarivhume, Muzvinafundo Lovemore Madhuku vanoti dare rasvika pamutongo waro mushure mekuramba humbowo hwaVaNgarivhume.
VaMadhuku vanoti VaNgarivhume vanogona kukandwa mujeri kwemwedzi mitanhatu asi vacharwisa kuti vasaenda kujeri.
Ivo VaNgarivhume vaudza Studio 7 kuti havana mhosva yavakapara asi kuti vari kushunguridzirwa nyaya dzematongerwo enyika chete.
Vamwe vakasungwa vachipomerwa mhosva imwe chete vanosanganisira mutori wenhau Hopewell Chin’ono, mumiriri weZengeza West muparamende vari nhengo yeTripple C VaJob Sikhala pamwe nemunyori wemabhuku ane mukurmbira pasi rose Tsitsi Dangarembwa.
Chin’ono akawanikwa asina mhosva panyaya iyi asi Dangarembwa akabatwa nemhosva akabhadhariswa faindi.
Mune imwewo nyaya, mukuru wekamabani yeMinerals Marketing Corporation of Zimbabwe uye vaimbove mumiriri weGutu West muparamende, VaTongai Muzenda vakashaya nezuro manheru munjodzi yemumugwagwa mumusha weBorrowdale.
Hanzvadzi yaVaMuzenda avo vakambove mutevedzei wegurukota rinoona nezvekugara zvakanaka kwevanhu, Seneta Tsitsi Muzenda vaudza Studio 7 kuti VaMuzenda vakashaya nezuro manheru vave kutosvika kumba kwavo.
VaMuzenda vasiya mudzimai nevana vaviri. Zvichakadi mutungamiriri wenyika, VaEmmerson Mnangagwa vatumira mashoko enyayaradzo kumhuri yekwaMuzenda.
Facebook Forum