Muzinda weAmerica muZimbabwe unoti zvirango zvakatemerwa vamwe vakuru vakuru vehurumende nemamwe makambani ehurumende mashoma nenyika yeAmerica, hazvirambidze mabhizimisi kana makambani enyika iyi kuti asime mari muno.
Vachitaura neStudio 7 kuZimbabwe International Trade Fair kana kuti ZITF muBulawayo mutauriri wemuzinda weAmerica muZimbabwe Amai Meg Riggs vanoti nyika yavo inofara kuti yakawanisa kudzoka kuzoratidza kudyidzana kwayo neZimbabwe pagungano iri mushure mekumbomira kuita izvi kwemakore ane chitsama.
Amai Riggs vanoti vari kufara kuti nyika yavo iri paZITF apo chirongwa chePresident’s Emergency Plan for AIDS Relief, kana kuti PEPFAR chasvitsa makore makumi maviri chichibatsira Zimbabwe kurwisa HIV/ Aids. Vanotiwo pane boka rakaparurwa munguva pfupi yapfuura reUnited States Chamber of Commerce rinobatisra makambani nemabhizimisi enyika mbiri idzi kuwana mikana yekuita mabhizimisi.
Vachipindura mubvunzo wekuti vanoti kudii pamusoro pemashoko ehurumende ekuti zvirango zviri kukanganisa hupfumi hweZimbabwe, Amai Riggs vati hazvisi zvirango asi huwori hunokanganisa hupfumi hweZimbabwe, vakati makambani ekuAmerica akawanda anoda uye anobvumidzwa kusima mari muno.
Asi vatiwo America ine mutemo wakajeka unorambidza makambani enyika iyi kusaita bhizimisi rine zvehuwori mukati.
Asi vachipindura, mukuru mubazi rezvekuburitswa kwemashoko muZanu-PF VaTafadzwa Mugwadi vati zvirango zvauraya nyika.
Asi mumwe mutevedzeri mutauriri webato rinopikisa VaFelix Mafa vati nyaya yehuwori ndiyo yauraya nyika.
Mutungamiri wenyika VaEmmerson Mnangagwa nevamwe vakuru vakuru vehurumende vanogara vachichema nerekuti zvirango zvakatemerwa Zimbabwe neAmerica nedzimwe nyika dzekumadokero zviri kuvhiringidza nyika.
Asi mumashoko avo vachivhura zviri pamutemo musangano weInternational Business Conference paZITF nezuro mutevedzeri wemutungamiri wenyika VaConstantino Chiwenga vakati kushanda kwemakamabani emunyika kuri kuramba kuchikura uye vekunze vari kusima mari muno vari kuwedzera vachiti izvi zvinoratidza kuti chinangwa chehurumende chekuvaka hukama nenyika dzepasi rose chiri kubudirira.
Vakatiwo sezvinogarotaurwa nemutungamiri wenyika VaEmmerson Mnangagwa, Zimbabwe yakavhura maoko ayo kutambira vemabhizimisi vekunze vanoda kusima mari munyika.
VaChiwenga vakati zvakakosha kuti vemabhizimisi nemakambani vaite mabasa avo nenzira dzakanaka vasingaite zvehuwori.
Mumiriri wemubatanidzwa wenyika dzemubatanidzwa weEuropean Union----name avo vakataurawo pamusangano uyu vakati pane mukana mukuru wekuvandudza kutengeserana kwemakambani nemabhizimisi eZimbabwe neemuEU. EU iri kuratidzira kekutanga segungano kuZITF sezvo makore adarika nyika dziri mugungano iri dzairatidzira dzakazvimirira.
Asi vakatiwo kune vakawanda vekunyika dzekumadokero vanoona Zimbabwe isina chimiro chakanaka vakati zvakakosha kuti Zimbabwe igadzirise izvi.
Gungano reZITF rakatanga nemusi weChipiri uye Mambo Mswati vechitatu venyika yeEswatini ndivo vachavhura gungano regore rino zviri pamutemo mangwana.
Facebook Forum