Mutungamiri wenyika, VaEmmerson Mnangagwa, nhasi vazivisa kuti sarudzo dzichaitwa musi wa23 Nyamavhuvhu uye kana pakashaya anokunda musarudzo dzemutungamiriri wenyika, sarudzo dzechipiri kanma kuti "run-off" dzichaitwa musi wa2 Gumiguru.
Kutarwa kwaitwa zuva resarudzo kunoreva kuti kunyange bhiri rekuvandudza mutemo wesarudzo rikapasa mudare reparamende haricha shandiswa musarudzo dzegore rino.
Muchiziviso chavo mugwaro reGovernment Gazette, VaMnangagwa vati matare ekunyoresa vachakwikwidza musarudzo dzemutungamiriri wenyika, paramende nemakanzura achagara munzvimbo dzakasiyana siyana munyika musi wa21 Chikumi.
Vanoda kupinda musarudzo dzemutungamiriri wenyika vachanyoresa kudare reNomination Court iro richagara padare reHigh Court muHarare.
Ko, vari kukwikwidzan naVaMnangagwa vanoti kudii nekutarwa kwezuva resarudzo? Mutungamiri weCCC VaNelson Chamisa vati, “Musi wa23 rinova zuva remuna August uri musi weChitatu ndopari kuuya rusununguko rweZimbabwe." Vatwi, "Mufaro uri kudzoka. Takanyimwa mufaro, takabirwa mufaro, takabirwa budiriro asi budiriro iyi iri kuudzoka musi wa23 saka tirikugadzirira.”
VaChamisa vatiwo,”Chii chatinoda kuti chiitwe pakugadzirira ikoko? Tinoda kuti maVoters Roll ange achizikanwa nemhunhu wese."
Vatiwo, "Munhu ari paVoters Roll azikanwe nemhunu wese. Todawo kuti mapolling agents ange asri kwese, sarudzo dziitwe pajekere, paruzhinji, pasaita munhu anozvambaradzwa kana kurova mumwe. Tiri kutonamata kuti dai munyika maita runyararo. Tiri kunamata kuti dai munyika maita rugare nekudanana. Panana Vengai tounza vana Farai...”
Mutauriri wemutungamiri webato reMDC VaDouglas Mwonzora, VaLloyd Damba vashora VaMnangagwa nekukurumidza kutara zuva resarudzo pachinenyaya iri kumatare yekutarwa kwemiganhu kuitira sarudzo.
“VaMnangagwa tine nyaya navo mudare asi varamba kuterera vakanotara zuva resarudzo. Asi zvisinei toda kuudza vana veZimbabwe kuti tiri kugadzirira kupinda musarudzo kunyange tisiri kufara nekuti tiri kupinda musarudzo dzakabirwa kudhara.”
Mumiriri weHarare East muNational Assembly, VaTendai Biti veCCC, vati havasi kufara nezvaitwa VaMnangagwa vachiti kutara kwavaita zuva resarudzo paramende isati yapedza kuzeya bhiri rekuvandudza mutemo wesardzo kunoreva kuti kunyange mutemo uyu ukapasa hauchashanda musarudzo dzegore rino. VaBiti vati, “Apa zvatoshaya basa." Vaenderera mberi vachiti, " Vatizve, "Zanu PF yaita zvainogara ichiita zvehumbimbindoga, zvekunyima vana veZimbabwe mukana wekuti vagadzirise mutemo wakashata wesarudzo. Mukana iwoyu watorwa nekuda kutarwa kwaita zuva resarudzo.”
VaBiti vaenderera mberi vachiti mutemo wesarudzo sezvauri hauna kunaka.
“Tanga tichida kugadzirisa kuti Code of Conduct ive nemazino kuti munhu akaityora anokwanisa kusungwa. Saka zvinhu zvakawanda zvatatichida kuita kugadzirisa mutemo wesarudzo.”
Asi gurukota rezvemutemo, VaZiyambi Ziyambi, vati paremende iri kuenderera mberi nekuzeya bhiri rekuvandudza mutemo wesarudzo. Vanoti bhiri iri haritadzisi nyika kuita sarudzo dzakachena. VaZiyambi vati, "“Chero zvauri iye zvino hapana zvaunotadzisa kuita sarudzo dzakachena. Vatizve, " Zvakanaka kuchinja mutemo asi parizvino hapana chinotadzisa kuita sarudzo dzakajeka.”
Mutauriri weMDC inotungamirirwa naVaDouglas Mwonzora, VaWitness Dube, vati havasi kufara kuti VaMnangagwa vatara zuva resarudzo vasati vagadzirisa nyaya dzegwaro revavhoti nedzimwe.
“Kungoita sarudzo zvinongoratidza kuti vanoda kuramba vachitonga”
Asi mumiriri weMberengwa North VaMarko Raidza veZanu PF, vati vanofara nezvaitwa nemutungamiriri wenyika.
“Ngatiregei kuita mhirizhonga nekuda kwezvematongerwo enyika tiite sarudzo murunyararo.”
Izvi zvatsigirwawo nemumiriri weChegutu West, VaDexter Nduna VeZanu PF avo vati VaMnangagwa vatevedza mutemo wenyika.
Sachigaro werimwe sangano rinoongorora sarudzo reZimbabwe Election Support Network, VaAndrew Makoni, vaudza Studio 7 kuti zvange zvichida kuvandudzwa nemutemo wesarudzo zvachanetsa kuzadzikisa.
Kana zuva resarudzo ratarwa nemutungamiri wenyika, vanhu vanoda kuvhota vanenge vasarwa nemazuva maviri chete ekunyoresa kuvhota.
Facebook Forum