Kushaya simba kwedhora remunyika pamberi pesarudzo kunonzi rave gangaidzwa kumukwenyi mhezi yavavira mudumbu kumutungamiri wenyika vaemmerson mnangagwa.
Nhasi dhora rekuamerica range richitengwa nemari inosvika zviuru zvipfumbamwe kana kuti US$1 to ZWL$9000 Zimbabwea dollars.
Dzimwe nyanzvi munyaya dzezvhupfumi dzakaita saMuzvinafundo Gift Mugano dzinoti mitemo iri kudzikwa nebazi rezvemari uye bhanga guru renyika reRBZ haisi kushanda sezvo mitengo yezvinhu iri kuramba ichiita chamurambamhuru.
RBZ yakaburitsa mashoko kuvatori venhau kuti vemabhizimisi vari kudhurisa zvinhu vachatorerwa matanhano anosanganisira kutorerwa marezinesi.
Asi vemabhizimisi vakaita seConfederation of Zimbabwe Industries vanoti vari kungozorwa mafuta enguruve yavasina kudya nekuti kwavanohodha zvinhu zvekugadzirisa zvinhu kunenge kuchidhura vamwe vachiti vanoda mari yekunze chete.
Izvi zvapa kuti vati hurumende ngaingoshandisa hayo dhora rekuAmerica nekuti zvemari yemunyika zvakona n’anga murapwa achida.
Asi nyanzvi munyaya dzezvehupfumi vari chipangamazano chebhanga guru renyika VaPersistence Gwanyanya vaudza Studio 7 kuti hurumende inokwanisa kudzikamisa dhora renyika nematanho ari kutora.
Facebook Forum