VaTafadzwa Masvayamombe Shumba vaimbova nhengo yeZanu-PF asi vari kukwikwidza vakazvimirira vega musarudzo dzekutsvagwa mumiriri wedare paramende kuMwenezi West vanoti motokari yavo yakapiswa nevatsigiri vebato reZanu-PF mushure mekunge vapesvedzerwa nevavari kukwikwidzana navo vakamirira bato reZanu-PF, Ama Priscilla Moyo.
VaShumba vanovazve mwanakomana wamushakabvu Isaaih Masvayamwando Shumba avo vakamboita mutevedzeri wegurukota rezvedzidzo vaudza Studio 7 kuti, “Amai Moyo vakatumira vanhu kunditevera vachifunga kuti ndaive mumota ndokuivharidzira vachibva vaipisa.”
Asi Amai Shumba varamba mhosva iyi vachiti vanoda runyararo. Vati, “Kuridziro yangu ndeyekuti vanhu ngativhotei murunyararo.” Vaenderera mberi vachiti, “Manyepo kuti ini ndakapisa mota yaTafadzwa.”
Mumwe mugari wekuMwenezi West kunzvimbo inonzi Chirindi, VaMpumelelo Hondo, vakaratidza kushushikana nechiitiko ichi.
“Ini semugari wemuno muMwenezi West zvinondityisa kuti vamwe vanhu vavakuomeserwa vachipisirwa motokari dzavo mhosva yavo iri yekuti vakwikwidzirei, zvinova zvinodzorera nzvimbo yedu kumashure isu tagara takasarira,” VaHondo vakadaro.
Asi mutauriri wemapurisa kuMasvingo, Assistant Inspector Kudakwashe Dhewa vakati Studio 7 itaure naVaNyathi. VaNyathi havanati vange vasingakwanise kutaura nezvemhirizhonga iyi, sezvo vange vari kutyaira motokari.
Bindura
KuBindura kuMashonaland Central Province, meya wedhorobha iri vari nhengo yeCCC VaBrian Kembo vanoti vatsigiri vavo vakarwiswa neveZanu-PF
“Tiri kuita dambudziko reveZanu-PF vari bkurova vatsigiri vedu veCCC kunyanya anonzi Matepe, zita rake chairo achinzi Regis Mandoka.” Vaenderera mberi vachiti, “Akarova mukomana anonzi Andrew akakuvara musoro zvakaipisa,” VaKembo vakadaro.
Asi VaMandoka varamba kunakurirwa nyoka mhenyu, vachiti pakaitika mhirizhonga vainge vasipo.
“Handisiri ini ndakumurova ini. Ini ndakanga ndisipo,” Mandoka akaudza Studio 7.
Churu, Harare
KuChuru mumusha weUshewekunze muguta reHarare, mumwewo ari kukwikwidza musarudzo dzekutsvagwa mumiriri weparamende ari webato reCCC rinotungamirwa naVaNelson Chamisa, VaTrustwell Chikomo vakapwanyirwawo motokari yavo nevavati vatsigiri vebato reZanu-PF.
“Tanga tichinamira mapepa edu ekutsvaga rutsigiro kuChuru kuUshewekunze kwandiri kukwikwidza ndokubva vechidiki veZanuPF vauya vakabvisa mapepa angu vakaisa avo pamotokari yangu vakatema-tema motokari yangu vakatoisa mashanga pasi payo vachida kuipisa. Mutyairi wemota atozobvisa motokari iyi nechimbi-chimbi kuti isatsva,” VaChikomo vakadaro.
Vanoongorora sarudzo vanoti zvinonetsa kuita sarudzo dzakachena kana munyika musinma runyararo.
Forum