Chikwata chiri kutungamira makundano eCastle Lager Premier Soccer League, cheHighlanders, chapinda mumitambo gumi nemisere chisati charohwa kubvira makundano aya atanga muna Kurume.
Highlanders nhasi yaita mangange 0-0 neZPC Kariba, ndokusvitsa mitambo gumi nemisere isina kukundwa kana mumutambo mumwechete.
Bosso yave nemapoinzi makumi matatu nemasere, uyezve mapoinzi mashanu pamusoro peNgezi Platinum Stars iyo yapinda mumapoinzi makumi matatu nematatu mushure mekunge yarova Bulawayo Chiefs 1-0 muBarbourfields Stadium.
Mutsigiri wemutambo wenhabvu, VaFarai Kambamura, vanoti mamiriro akaita zvinhu ari kuratidza kuti Bosso yave nemukana wakanyanyisa wekutora mukombe mukuru uyu.
"Ndirikuona iine mukana mukuru wekutora mukombe uyu. Saka Highlanders ndiyo inototora," vanodaro VaKambamura.
Asi mutsigiri weDynamos, VaPhilosophy Nyapfumbi, vari kuramba izvi vachiti pakugumisira Dembare ndiyo ichaenda nechimuti.
"Dynamos ndiyo chikwata chemwaka uno. Vari kutungamira asi pamagumo, Dynamos ndiyo inotora," vadaro VaNyapfumbi.
Asi Dynamos, iyo iri kusangana neHwange mangwana, iri kure zvikuru nehutungamiri sezvo iine mapoinzi gumi pasi peBosso.
Mitambo yakawanda yanhasi yabuditsa zvanga zvisingafungirwe neruzhinji apo zvikwata zvakawanda zvine mbiri zvarohwa.
FC Platinum, iyo ine mukombe uyu, yarohwa pamusha zvekare asi iko zvino 2-1 neSimba Bhora.
Kukundwa uku kwasiya FC Platinum yasaririra zvikuru sezvo yasiiwa neHighlanders nemapoinzi gumi nemaviri.
Asi chikwata chabuda nekukunda kukuru iSheasham iyo yarova Chicken Inn 1-0 kuLuveve, ndokukwira pamusoro petafura kusvika pachinzvimbo chegumi nembiri.
Liberty Maseuri ndiye akanda chibodzwa cheSheasham.
Mimwe mitambo yanhasi yapera seizvi … Black Rhinos 1 Cranbourne Bullets 2,
Greenfuel 2 Yadah 0.
NeSvondo mitambo iriko yakamisa yakadai.... Manica Diamonds v Caps United - Gibbo, Herentals v Triangle - Mandava.
Kumakundano emutambo webhora remaoko e2023 Vitality Netball World Cup, chikwata cheZimbabwe chiri munzira kudzoka kumusha asi chasiya makundano aya achibhebha moto, zvikwata zvichirwira kupinda mufainari yemakwikwi aya.
Asi zvikwata zvave kusangana mufainari iyi zvazivikanwa mushure mekunge England yarova New Zealand 46-40,
Australia neEngland dzave kusangana mangwana kuona kuti anotora mukombe mukuru uyu ndiani.
Zimbabwe yave kumirira makundano a2027 asi paine mamwe makundano pakati apa.
Mutambi wechikwata cheWarren Park Netball Community Club, Mercy Kudzereka, anoti pane zvinoda kugadziriswa pamaGems asati apinda mune mamwe makundano.
"Matambiro edu anofanira kugadziriswa kubva kumasure kusvika kumberi. Vatambi vekumberi havafanire kutamba vachidzorera bhora sure. Bhora rinofanira kuti rikabva, siure pakati, roti mugedhe," anopa zano Kudzedzereka.
New Zealand ndiyo ine mukombe weNetball World Cup uyu asi haichakwanisa kudzivirira mukombe wayo.
Totarisa makundano eFifa Women’s 2023 World Cup...
Spain neJapan nhasi dzawana matikiti ekupinda mumakota fainari emakwikwi aya ayo ari kuitirwa kuNew Zealand neAustralia.
Spain yazvambura Switzerland 5-1, ukuwo Japan ndokurova Norway 3-1 kuti vapinde pazvikwata zvisere zvichiri kurwira mukombe uyu, uyo uri mumaoko eAmereka.
Zvikwata zvese zvitatu zvemuAfrica zvichirimo mumakundano aya kusanganisira South Africa, iyo iri kutamba neNetherlands na 4 dzemangwanani mangwana.
Nigeria iri kusangana neEngland neMuvhuro mangwanani, Morocco ichizotamba neFrance neChipiri.
Forum