Murairidzi weDynamos mutsva Genesis Mangombe atambirwa nerufaro mushure mekunge chikwata chake chapinda mukota fainari yeChibuku Super Cup zvichitevera kurova kwachaita Simba Bhora 1-0 muBarbourfields Stadium muBulawayo nhasi masikati.
Chibodzwa chabva kuna Emmanuel Paga chapa Dynamos kukunda uyezve chinzvimbo mumakota fainari emakundano aya.
Kukunda uku kwafadza Mangombe, uyo anga ari pachigaro kekutanga mushure mekutambidzwa basa kwadzingwa Hebert Maruwa pakati pesvondo.
Munyori mukuru weDynamos, VaWebster Marechera, vanoti gore rino vanoda kutora mukombe uyu, uyo vanetseka kutora kubvira makundano aya atanga muna 2014.
“Mukombe uyu watinzwenga kwemakore akawandisa asi ikozvino tinovimba kuti mwari achatikomborerawo tiutorewo,” vanodaro VaMarechera.
VaMarechera vanoti basa riri mumaoko evarairidzi vavo kuona kuti chikwata ichi chakunda mumitambo inotevera kuti vatore mukombe uyu.
“Zvave mumaoko evarairidzi vedu kuti vagadzirire zvakakwana uyezve kuti vamisa zvidhoti zvavo zvakanaka. Vakakwanisa izvozvo tinotora,”Zvawedzera VaMarechera avo vave nemakore akati wandei vari muhutungamiri hweDembare.
Kunze kwekupinda mufainari kamwechete, Dynamos haisati yambotora mukombe uyu.
Asi Dynamos haisi yega mumaroto ekuda kutora mukombe weChibuku Super Cup uyu mushure mekunge FC Platinum yazvambura Yadah 4-0 muMandava Stadium.
Asi murairidzi wavo Norman Mapeza haasi kuvhunduka achiti iye Chibuku Super Cup irwendo urwo vasati vasvika kwavari kuda kuenda.
“Makundano aya rwendo. Munozofara kana kupemberera masvika kwamuri kuenda. Ikozvino tatanga rwendo rwacho,”anodaro Mapeza.
Chicken Inn, iyo zvekare isati yambotora mukombe uyu, yapinda mukota fainari mushure mekurovawo Greenfuel 1-0, musi mumwechetewo apo Ngezi, iyo yakatora mukombe uyu muna 2016, yarova Triangle 2-1.
Bulawayo Chiefs, iyo ine mukombe uyu, iri kusangana neHighlanders mumutambo weBulawayo Derby muBarbourfields Stadium.
Caps United, iyo iri kutatarika mumitambo yeligi, iri kutarisirawo kuita zviri nani mumukombe uyu apo iri kutamba neHwange muBata Stadium.
Chikwata chinotora mukombe uyu chinotambidzwa mari inoita iyo zviuru makumi manomwe nezvishanu zvemadhora ekuAmereka.
Pamusoro pezvo, chinowana tikiti rekumirira Zimbabwe mumakundano e2024 Caf Confederation Cup zvichitevera kudzorwa kwakaitwa Zimbabwe munhabvu yepasi rese neFIFA.
Zvichakadaro, makundano enhabvu anoteverwa nechaunga emhiri kwemakungwa eEnglish Premier League akasimuka zvine mutsindo nezuro. Nhasi makwikwi aya apinda muzuva repiri, ukuwo LaLiga neFrench Lique 1 dzichisimudzawo guruva.
Mumutambo wakavhura vhura makundano aya nezuro, chikwata chine mukombe uyu che Manchester City chakatamba nezuro apo chakarova Burnley, iyo ichangopinda muligi iyi, 3-0.
Mutambo wepiri watambwa nhasi munguva dzekudya kwemasikati Arsenal, iyo yapakedza iri pachinhanho chechipiri mwaka wapera, yarova Nottingham Forest 2-1.
Asi mutambo mukuru musvondo rekutanga ndeuyo uriko mangwana apo Chelsea iri kusangana neLiverpool munhandare yeStamford Bridge.
Chimwe chikwata chine mukurumbira Manchester United iri kutamba mutambo wayo wekutanga neMuvhuro.
Totarisa makundano e2023 FIFA World Cup.
Mutambo pakati pezvikwata zvine mukurumbira Australia neFrance wasvika mumapenareti Australia ndokukunda 7-6 nekutora tikiti rekupinda musemi fainari.
Zvikwata izvi zvanga zviri mangange 0-0 munguva yakatarwa uye neye extra time asi Australia yazokunda ndokutora chinzvimbo chekusangana neEngland.
Englanda yacho haina kunetseka zvakanyanya apo yarova Colombia 2-1. Mune imwe semi fainari Spain irikusangana neSweden mumutambo wakaoma zvikuru.
Makundano aya ari kupera musi weMugovera svondo rinouya apo pachatambwa fainari.
Mukombe uyu wave kunyorwa zita idzva mushure mekunge zvikwata zvese zvakambotora USA, Japan, Germany neNorway dzakabuditswa.
Forum