Chikwata cheNgezi Platinum Stars chawedzera kuchema kweCaps United, iyo iri kungorohwa-rohwa mumakundano eCastleLager Premier Soccer League.
\Ngezi yarova Caps United 1-0 nechibodzwa chabva kuna Quadr Amin ndokukanda Caps United pachinhanho chegumi mumakundano aya.
Pamusoro pezvo, Ngezi yadimbura hutungamiri hweHighlanders pamusoro petafura kusvika pamapoinzi maviri chete.
Highlanders ine mapoinzi makumi matatu nemasere, Ngezi yave nemapoinzi makumi matatu nematanhatu.
Murairidzi weNgezi, Takesure Chiragwi, anoti vacharamba vachiita nepese pavanogona kuti vatore mukombe weligi.
'Makwikwi atiri nawo. Mumakwikwi munoda kudhonza, munoda kuramba makashinga munoda kusimba. Zvinobuda mukupera kwegore ndizvi zvinoratidza mashandiro ataita," anodaro Chiragwi.
Asi hutungamiri hweHighlanders hunodzokera pamapoinzi mashanu kana vakarova Black Rhinos muBarbourfields Stadium neSvondo.
Mangwana zvekare munhandare yeBata muGweru, murairidzi mutsva weDynamos, Genesis Mangombe, ari kuwana mutambo wake wekutanga weligi apo Dynamos iri kusangana neSheasham.
Mutsigiri weDynamos, VaClayton Maticha, vanoti vari kutarisira shanduko mumatambiro echikwta chavo nemurairidzi mutsva uyu.
"Isu semasupporters tinoda kukunda. Tinokumbira kuti agadzirise matambiro edu. Tirikutarisira shanduko huru pane zvataga tichiita," vadaro VaMaticha.
Asi veruzhinji vashamisika nezvabuda kuNyamhunga Stadium uko FC Platinum yaita mangange 1-1 neCranbourne Bullets, iyo iri pazvikwata zviri pasi pasi mugungano iri.
Cranbourne yave nemapoinzi gumi nemanomwe, ukuwo FC Platinum ichiita mapoinzi makumi maviri nemanomwe, mapoinzi gumi nerimwechete pasi peHighlanders.
Asi murairidzi weFC Platinum, Norman Mapeza, anoti vese vari kuti chikwata chake chabuda muhondo yekutora mukombe uyu ngavambonyarara nekuti rwendo rwuchiripo.
"Irwendo kaurwu kuti tikaita izvi tinosvika patiri kuda kusvika.
Kuti ndibve muno kuenda kuBulawayo ndinogona kukwira michovha kana mishanu, asi ndinofanira kusvika Bhuruwayo," anodaro Mapeza.
Hurongwa hwemitambo hwabva kumukuru wekumahofisi ePremier Soccer League, VaKennedy Ndebele, hunoti FC Platinum ine Highlanders svondo rinouya.
Mimwe mitambo yatambwa yapera seizvi, Simba Bhora 0 Chicken Inn 1;
Bulawayo Chiefs 0 ZPC Kariba 0; Herentals 1 Greenfuel 0
neSvondo Triangle iri kusangana neManica Diamonds.
Zvichadaro, makundano eFIFA Women's World Cup 2023 ari kusvika kumagumo mangwana nefainari pakati peEngland neSpain.
Zvikwata izvi zviri kusangana munhandare yeAustralia Stadium muSydney nenguva dza 12 masikati.
Sweden yapedza iri pachinzvimbo chechitatu mushure mekurova Australia 2-0 neMugovera masikati.
Forum