Mutungamiri webato guru rinopikisa reCitizens Coalition for Change VaNelson Chamisa vaudza vatori venhau muHarare kuti sarudzo dzakabarirwa zvemhando yepamusoro uye havasi kudzitambira.
Vanoti vari kuunganidza humbowo vachiti zvakaziviswa neZEC ndezvemugotsi matsuro.
VaChamisa vaudza vatori venhau kuti ndivo vari kuzoumba hurumende itsva kunyangwe vasina kutsanangura kuti izvi vachazviita sei. Vati havasi kuzomira mamwe makore mashanu.
VaChamisa vatiwo humbowo hwakabva kune vaivamirira musarudzo kana kuti maV11 hausi kuenderana nezvakaburitswa neZEC.
Vati vanowirirana neSADC kuti sarudzo hadzina kufambiswa zvakanaka. VaChamisa vati, “Takunda sarudzo idzi, ndisu takatungamira uye tiri kutoshamisika kuti sei VaMnangagwa vari kunzi ndivo vakakunda musarudzo idzi.
VaChamisa vati zvakaitwa neZEC neZanu-PF kushandisa mapepa ekuvhota kupidigura hurumende sezvakangoitwa muna 2017 pakapidigurwa hurumende yamushakabvu Robert Mugabe uye muna 2018 pakaitwa sarudzo dzavakati dzakabirirwa.
Forum