Chikwata cheHerentals chapa mukana kuHighlanders kuti iwedzere hutungamiri wayo mugungano re Castle Lager Premier Soccer League mushure mekukunda Ngezi Platinum Stars.
Tino Benza akanda chibodzwa chasiyanisa Herentals neNgezi Platinum Stars nhasi masikati apo Ngezi yarohwa 2-1 muMandava Stadium.
Hapana anga achitarisira kuti chikwata chekuMhondoro- Ngezi ichi chinorohwa asi mumutambo wenhabvu munoitika zvese zvese.
Ngezi Platinum Stars yanga ichienda pamusoro petafura yegungano iri nepoindi imwechete dai yakunda mumutambo wayo nhasi.
Herentals inoshandisa Mandava Stadium semusha wayo zvichitevera kuvharwa kweNational Sports Stadium.
Pari zvino Highlanders yave nemapoinzi makumi mana rimwe, mapoinzi maviri pamusoro peNgezi iyo ine mapoinzi makumi matatu nemapfumbamwe.
Highlanders iri kutamba mangwana neChicken Inn.
Manica Diamonds, iyo yarova Greenfuel 2-1, yaenzana pamapoinzi makumi matatu nemapfumbamwe neNgezi Platinum Stars.
Mutsigiri weCaps United VaPhillip Regede vanoti chikwata chavo pamwe neDynamos ngavakanganwe nekuti hondo iri pakati peHighlanders neNgezi.
"Ini ndiri weCaps United asi chokwadi ndechekuti isu neDynamos hapasisina. Mukombe urikuenda kuHighlanders kana Ngezi." vanodaro VaRegede.
Muongorori wemutambo wenhabvu VaFarai Kambamura vanoti Highlanders ine mikana yakawandisa.
"Highlanders irikutora nekuti mitambo yayo yakawanda yekunze irikutambira pamusha nemhaka yekushaikwa kedzinhandare kune mamwe maguta," vaKambamura vanofungidzira.
Asi nhengo yeZimbabwe National Soccer Supporters Association, VaTinashe Museti vanoti rwendo rwuchiripo.
"Mamiriro akaita zvingu kana Dynamos chaiyo inotora,"vadaro VaMuseti avo vanofarira chikwata cheMasvingo United.
Dynamos iri kuswedera pedyo nehutungamiri mushure mekurova Cranbourne Bullets 1-0.
Mimwe mitambo yanhasi yapera seizvi …Bulawayo Chiefs 1 FC Platinum 1
Sheasham 1. Hwange 0, Simba Bhora 1 Yadah 1.
Mimwe mitambo iriko neSvondo yakamira seizvi... Caps United v Black Rhinos,
Highlanders v Chicken Inn neTriangle v ZPC Kariba.
VePSL havasati vazivisa kuti musika wekutenga nekutengesa vatambi vatswa unovhurwa rinhi.
Forum