Makanzura emuHarare akakunda musarudzo dzichangobva kuitwa, nhasi atora mhiko dzawo dzekutanga basa pamuzinda wekanzuru iyi, paTown House muHarare. Asi chirongwa chekutora mhiko ichi, chaonawo kuchiitika mhirizhonga pamuzinda uyu, apo vatsigiri vemapato anoti Zanu PF ne CCC, vatatsurana, vachiratidza rutsigiro kumapato avo.
Pange pachigadzwa makanzura aya, paita bata murefu, bata mupfupi pamuzinda weTown House, apo vatsigiri veZanu PF neveCCC parwisana vatsigiri veZanu-PF neTripple C vange vakaungana panze. Pane vanhu vane chitsama vakuvara mukurwisana. VeZanu PF veCCC ndivo vari kunakurirana nyoka mhenyu pakuti ndiyani atanga mhirizhonga.
Mutauriri wemapurisa Assistant Commissioner Paul Nyathi vaudza Studio 7 kuti vachiti kuferefeta nyaya iyi.
Nyaya yemhirizhonga ndiyo yapawo kuti mumwe wemakanzura akasarudzwa, VaWomberaishe Nhende veCCC vanomiririra Ward 27 yekuGlen Norah, vasabatane nevamwe makumi mashanu nesere kutora mhiko yekutanga basa nhasi. Vari kuchipatara kwavari kurapwa, mushure mekupambwa nekuitwa kafiramberi nevanofungidzirwa kuti vasori muHarare.
Mabharani wekanzuru yeHarare VaPhakamile Mabhena Moyo vazivisa kuti VaNhende vachatora mhiko yavo kana vave kunzwa zviri nani.
Asi vachitaura neStudio 7 mushure mekunge vatora mhiko yavo, vaimbova Meya weguta iri, VaJacob Mafume, vavimbisa kushandura chimiro cheHarare.
Studio 7 yabvunzawo VaMafume kuti kuuya kuzotora mhiko kwemakanzura eCCC, hakurevi here kuti vari kubvumirana nezvakabuda musarudzo dziri kunzi nebato ravo dzanga dzisina kuchena, vakapindura vachiti…
Kanzura wenzvimbo yeMbare, Ward 3, uye vari veZanu PF, VaSimbarashe Chanachimwe, vanozivikanwa nekunzi Dhama, uye vakambopomerwa mhosva yekutengesa zvinodhaka, vashora mamwe makanzura eCCC, avati atadza kusimudzira chimiro chenzvimbo yeMbare.
VaReuben Akili, mukuru wesangano rinomirira vagari vemuHarare, reCombined Harare Residents Association, vanoti makanzura akasarudzwa aya, ane jana rekugadzirisa nhunha zhinji dzine vagari vemuHarare.
Izvi zvatsinhirwa nemukuru werimwe sangano reHarare Residents Trust VaPrecious Shumba.
Munyori mukuru anoona nezvekufambiswa kwebasa mudunhu reHarare, VaTafadzwa Muguti vaudza Studio 7 kuti vachaedza nepose pavanogona kushanda pamwechete nemakanzura agadzwa aya.
Makanzura atora mhiko aya, ari kutarisirwa kupinda muhurongwa hwekudzidziswa basa rehukanzura mumazuva mashoma ari kutevera, kuchitiwo meya nemutevedzeri weguta iri, vanzi vachasarudzwa rimwe zuva.
Forum