Makundano eCastle Lager Premier Premier Soccer League ari kudzoka munhandare yeNational Sports Stadium mangwana mushure memwedzi mitatu, achiunza mutambo mukuru pakati peCaps United neDynamos, uyo unounganidza chaunga.
Chaunga ndicho chiri kutarisirwa munhandare iyi mushure mekunge Dynamos, iyo iri pamusha mumutambo uyu, yazivisa kuti vatsigiri venhabvu vari kubhadhara madhora matatu chete kuona mutambo mukuru uyu.
Mukuru wekumahofisi eDynamos, VaJonathan Mashingaidze, vanoti vari kuda kupa vatsigiri vavo mhembererero yakanaka yekusvitsa makore makumi matanhatu kwechikwata chavo kuburikidza nekuvarerutsira kuti vakwanise kuona chikwata chavo chichitamba.
"Mhemberero dzedu dze 60 years kuti dzifambe zvakanaka, dzinofanira kusanganisira vatsigiri vedu. Kutanga mangwana nekwese kwatichanotamba, vatsigiri vedu vanofanira kubatana nesu mumhemberero idzi," vadaro VaMashingaidze.
Mwedzi mitatu yapfuura Dynamos yanga ichishandisa nhandare yeBarbourfields muBulawayo semusha wayo mushure mekunge National Sports Stadium yambovharwa ichigadziriswa nyaya dzemvura dzainetsa.
Dynamos neCaps United dzakatambira mutambo wadzo wekutanga wemwaka uno muNational Sports Stadium umu, umo Makepekepe yakadamburwa 2-0.
Dembare neMakepekepe dziri kusangana panguva iyo Dynamos yave nemurairidzi mutsva, Genesis Mangombe, uyezve ichibaka moto asi panguva imwecheteyo Caps United iri kuremerwa nemitambo yayo.
Asi akatambira Dynamos mazuva ekare-kare, Labani Kandi, anoti mitambo yeDynamos neCaps United haina kuti ari kutamba zvakanaka nguva yacho ndiani asi unongoitika zvese zvese.
"PaHarare Derby hapana zvekuti team irikutammba zvakanaka ndeipi. Irikutamba zvakanaka iyoyo inogona kudyiwa. Izvi zvakabvira kare kare kubvira pataitambawo isu kunana 1976 ikoko," adaro Kandi.
Akatambirawo Caps United makore mashoma apfuura, Frank Nyamukuta, anotiwo mitambo iyi haina chinonzi fomu pachirungu.
"Derby haina basa kuti muri mufomu. Chero muri mufomu menyu imomo munogona kuuya mukasangana nezvimwe mukashaya kuti kovahu ava vamuka rinhi, vamuka chiye chinonzi chibhebhenenga chiye. Igemhu rinongokupai
simba rekukunda chero musiri kutamba zvakanaka nguva yacho," ayambira Dembare Nyamukuta.
Donald Mudadi, Tanaka Shandirwa, nakaputeni Frank Makarati vari kutamba zvinodakadza kuDynamos, asi William Manondo, Phineas Bhamusi na Godknows Murwira veCaps United vanofanira kusimudza matambiro avo
kuti vakwikwidze zvine mutsindo mumutambo uyu.
Mudadi, Shandirwa, Makarati, Manondo, pamwe naMurwira nhasi vadomwa muchikwata cheZimbabwe chine mutambo wehushamwari neBotswana musi wa 27 Gunyana.
Mutsigiri weCaps United, VaTafadzwa Mangava, vanoti chikwata chavo neSvondo chiri kudzorera kurohwa kwachakaitwa 2-0 mumutambo wekutanga.
Asi mutsigiri weDynamos VaTedius Bhunu vanoti chikwata chavo chiri kukunda nekutora mapoinzi ese matatu akakosha muhondo yavo yekutora mukombe weligi.
"Isusu, veDembare tirikutarisira kukunda. Tirikutarisira kuti
tichatora mapoinzi ese matatu. Caps tirikuirova," ichi chishuwiro chava Bhunu.
Pari zvino, Dynamos iri pachinhanho chechitanhatu nemapoinzi makumi matatu nematanhatu, Caps United iri pachinhanho chegumi nechimwechete nemapoinzi makumi maviri nemapfumbamwe.
Ngezi Platinum Stars ndiyo iri kutungamira makundano aya nemapoinzi makumi mana nemasere mushure mekudambura ZPC Kariba masikati.
Ngezi yave nemapoinzi mana pamusoro peHighlanders, iyo iri kutamba mutambo wayo neHwange muColliery mangwana.
Mimwe mitambo yatambwa neMugovera yapera seizvi, Green Fuel 0 Simba Bhora 3; Sheasham 1 Cranborne Bullets 0; FC Platinum 2 Herentals 0; Chicken Inn 1 Triangle 1; Yadah 1 Byo Chiefs 2.
Forum