Kurwisana kunotyisa kunonzi kwatanga pakati peIsrael nechikwata cheHamas chemuPalestine.
Chikwata cheHamas chinonzi chashamisa Israel nekuirwisa zvakasimba chikauraya zvizvarwa zvenyika iyi zvinodarika zana (100) uye kupamba mauto mashanu nekutora mimwe misha.
Israel yabva yatangawo kurwisa dunhu reGaza, ichiti iri kurwisana zvakasimba nemauto echikwata cheHamas akwanisa kupinda munzvimbo nomwe dziri pasi peIsrael.
Bazi rezvehutano muPalestine raudza sangano renhau reAssociated Press kuti vanhu vangangosvika kuzana nemakumi mapfumbamwe (190) vemuGaza Strip vaurayiwa mukudzosera kwaitwa neIsrael uye vamwe vangangosvika chiuru nemazana matanhatu negumi (1,610) vakakuwadzwa.
Mauto eIsrael anonzi abvuma kuti kune zvizvarwa zveIsrael zvine chitsama zvapambwa.
Mumwe mukuru weHamas, Saleh Arouri, audza nhepfenyuro yeterevhizheni ye Al-Jazeera kuti chikwata chake chine zvizvarwa zveIsrael zvine chitsama zviri muhutapwa, kusanganisira vakuru vechiuto.
Ati izvi zvichashandiswa mukupana kwevasungwa senzira yekuburitsa nayo zvizvarwa zvePalestine zviri mumajeri emuIsrael.
Mitumbi yemauto eIsrael pamwe nevanhuwo zvavo uye varwi veHamas inonzi iri kuonekwa mumigwagwa yemadhorobha emuIsrael. (Associated Press)
Forum