Makundano eCastle Lager Premier Soccer League atora imwe nzira mushure mekurohwa kwaitwa Ngezi Platinum Stars, iyo iri kutungamira gungano iri.
Ngezi Platinum Stars yarohwa 1-0 neFC Platinum mumutambo uyo waunganidza chaunga chinotyisa munhandare yeMandava Stadium muZvishavane nhasi masikati.
FC Platinum, iyo ine mukombe uyu, yave pachinzvimbo chechipiri nemapoinzi makumi mana nematanhatu, mapoinzi mashanu pasi peNgezi Platinum Stars, iyo iri kutungamira gungano iri.
Mutambo uyu usati watambwa FC Platinum yanga iri pasi peHighlanders, iyo yarohwa 3-0 neSimba Bhora nhasi masikati muBaobab Stadium.
Highlanders yadzika kusvika pachinzvimbo chechitatu nekurohwa uku uyezve yaramba iine mapoinzi makumi mana nematatu.
Zvikwata zvine mukurumbira Dynamos neHighlanders zviri kutsvedza kubva pamusoro petafura apo pakambotanga paine Caps United, iyo yave kurwira nzvimbo yekuramba iri muPSL.
Caps United iri kushanya kuHwange mangwana uko iri kutamba neChipangano muColliery.
Mutsigiri wemutambo wenhabvu, VaOliver Musongoro, vanoti semaonero avo zvikwata zvine mbiri Caps United, Dynamos neHighlanders, hazvina chazvinobuda nazvo mwaka uno.
"Hanisikuona Caps. Dynamos kana Highlanders dzichitora mukombe uyu nekuti hadzibhandare. FC Platinum kana Chicken Inn ndidzo dzinotora," vadaro VaMusongoro.
Dynamos iri kusangana neHerentals muNational Sports Stadium mangwana.
Mutsigiri weDembare, VaHumprey Tahwa, vari kufara nekudzoka kwechikwata chavo muNational Sports Stadium mushure memwedzi mitatu vachishandisa Barbourfields Stadium muBulawayo semusha.
"Tiri kufara kuti bhora radzoka muHarare. Taive tave kuita kunge takasasika kufamba kusvika kuBulawayo. Tirikufara,' vadaro VaTahwa.
Asi Black Rhinos yasimuka kubva pasi pasi petafura kusvetuka chimwe chikwata chemauto eZimbabwe, cheCranbourne Bullets, mushure mekurova
ZPC Kariba 4-2 munhandare yeBata muGweru.
Black Rhinos yave nemapoinzi makumi maviri nematatu, mapoinzi maviri pamusoro peCranboune Bullets.
Murairidzi weBlack Rhinos, Saul Chaminuka, anoti mazuva emufaro akawanda ari munzira.
"Zvinhu zvedu zviri kufamba. Ramangwana chivimbo chedu ndechekuramba tiri muPSL,' avimbisa Chaminuka.
Asi Cranbourne Bullets, iyo inorairidzwa naNesbert Saruchera, iri kutamba mangwana neGreenfuel kuChisumbanje uko kwave kumusha weGreenfuel, iyo inorairidzwa naRodwell Dhlakama.
Mumwe mutambo wanhasi wapera uri mangange 1-1 pakati peChicken Inn neManica Diamonds.
Mimwe mitambo yePSL iriko mangwana uyezve yakamira seizvi …. Sheasham vs Bulawayo Chiefs, Yadah vs Triangle
Ngezi Platinum, iyo iri pamusoro, ine Chicken Inn pamusha svondo rinouya.
Forum