Muchirongwa chedu chemagitare chesvondo rino tine nyaya inosiririsa yekushaya kwemuimbi wechidiki ane mukurumbira aiimba musambo weAfro Pop, Garikai Munashe Mapanzure, aizivikanwa nevazhinji nerekuti "Garry Mapanzure'’.
Garry ashaya mangwanani anhasi ari muchipatara chekuMasvingo mushure mekuita tsaona nemotokari nemusi weChina manheru mumugwagwa weMasvingo -Beitbridge.
Garry akakurira muchitendero umo vabereki vake vaive vafundisi uye ndimo maakatangira zvekuimba pamwe nekurodza tarenda rake.
Akapinda chikoro kuKyle kusvika apedza zvidzidzo zvake zvesekondari, akazotanga basa rake remumhanzi mukupera kwa2017 apo akaburitsa kambo kake kekutanga kainzi “Wapunza,” ako kakaonekwa nevanhu vanodarika mamirironi maviri, kana kuti 2 million, padandemutande reYouTube.
Muna 2018, akahwina mumakwikwi e emPawa Africa Pick, akave muimbi wekutanga kubva muZimbabwe kuhwina mumakwikwi evaimbi aya.
Kuburikidza nechirongwa ichi, Garry akaburitsa "Slow," iyo yakaiswa pa YouTube neve emPawa. Muna 2019 akadomwa kuti awane mibairo ine mukurumbira yeAFRIMA muchikamu cheBest Artiste, Duo kana Group in African R'N'B & Soul ne kambo kanonzi TV Room kaakaita naHillzy.
Mumwe wechidiki anobatsira vaimbi sachipangamazano uye ari maneja wemumwe muimbi ari kusimukawo zvine mutsindo, Sarungano, VaEugene Museredza, vanoti, “Indastiri yemagitare yasikirwa zvikuru nekushaya kwa Garry, rufu rwetsaona runorwadza kuti harugoni kugadzirirwa, runongouya musingafungiri.
"Garry muimbi aive ne shungu nechido chekukurudzira vamwe kuti vaone kuti kuimba rinogona kutova basa riniokuchengeta”.
Mmwewo muimbi wechidiki, Bernard Betera, anoti kushaya kwaGarry kwasiya vende guru achiti, “Sevaimbi vechidiki, tarwadziwa zvikuru. Toshuvirawo kuti mhuri yake inyaradzwe, ticheme tiine tariro.”
Garry akaita zvidzidzo zveArchitectural Design kuNorth China University of Technology, akazotamira kuLondon kwaakange ave kushanda nekambani yemimhanzi yeRunabeat Music.
Akagarako achibika mimhanzi nemavhidhiyo ndokuzodzoka kumusha mugore rakapera ra2022.
Pakaitika tsaona iyi akanga aine hanzvadzi yake nemuzukuru wake, vese vakashaya mutsaona iyi.
Forum