Hurumende yeIsrael inonzi yakurudzira kuti vanhu vanodarika zviuru makumi maviri vari mudunhu reKiryat, pedyo nemuganho wenyika iyi neLebanon, vabviswe.
Izvi zvinotevera kurwisana kwakasimba pakati pemauto eIsrael nechikwata chinotsigirwa neIran cheHezbollah munzvimbo iyi.
Izvi zviri kuuya apo hondo yeIsrael neHamas yemuPalestine iri kuenderera mberi mapoka akawanda pamwe nedzimwe nyika vachikurudzira kuti mapoka maviri ari kurwisana aya ataurirane kuitira kumisa hondo iyi, iyo yaurayisa vanhu vakawanda.
Sangano reUnited Nations riri kukurudzirawo kumiswa kwekurwisana uku kuitira kuti rubatsiro rwukwanise kusvitwa kuGaza.
Ukuwo, mutungamiri weAmerica, VaJoe Biden, vakazivisa nemusi weChina manheru kuti vachange vachiendesa chikumbiro kudare reparamende renyika yavo chekuti homwe yemari yekubatsira Israel muhondo yayo neHamas iwedzerwe.
VaBiden vakataura izvi vari kumuzinda wavo weWhite House mushure mekushanyira nyika yeIsrael nekuita misangano nemutungamiri wehurumende yeIsrael, VaBenjamin Netanyahu, muTel Aviv.
Vanhu vanodarika chiuru chimwe nemazana mana, kana kuti 1 400, vanonzi vafa muIsrael, ukuwo vanosvika zviuru zviviri nemazana masere, 2 800, vachifa muPalestine kubva zvatanga hondo iyi musi wa 7 Gumiguru.
Vagari vemunyika dzakawanda pasi rose vanotsigira Israel nevamwe vanotsigira Palestine vari kuratidzira vachishoropodza hondo iyi.
Nyanzvi munyaya dzezvematongerwo enyika uye vari mutungamiri webato rinopikisa reDemocracy Party, Doctor Urayai Zembe, vanoti zvakakosha kuti nyika dzakadayi seEgypt dzivhure miganho yadzo kuti rubatsiro rwusvike kuvanhu vari muGaza, uye kuti mapato maviri eIsrael neHamas vataurirane.
"Zvinotoda kuti pave nemasangano akadayi seUnited Nations nenhumwa dzinobva kumapoka maviri aya kuti nhaurirano dziitike sezvo pakawoma kuti nyhika yeIsrael neHamas vataurirane parizvino tichitarisa hukama huri pakati pavo," Muzvinafundo Zembe vaudza Studio7.
Forum