Nhengo dzebato rinopikisa reCitizens Coalition for Change, CCC, dzakadzingwa nevanozviti ndivo vakafanobata chinzvimbo chemunyori mukuru mubato iri, VaSengezo Tshabangu, dzaisa magwaro adzo kumatare ekunyoresa kukwikwidza musarudzo dzichaitwa muna Zvita.
Nhengo shanu dzinonzi dzanyoresa mazita adzo mudare remuBulawayo dzichishandisa zita reCCC asi dzimwe shanu dzichinyoresawo dziri pasi paVaTshabangu.
VaFibeon Kufahakutizwi vaisa magwaro avo muHarare, ukuwo VaPrince Dubeko ve CCC vakwanisawo kuisa magwaro avo mudare ragara kuBinga North.
Matare agarawo mumaguta madiki akaita seGwanda, Hwange, Masvingo, Beitbridge nemamwe.
Vakwanisa kunyoresa mudunhu reBulawayo South vanoti VaRaj Modi veZanu PF,
VaJames Sithole veCCC naAmai Nicola Jane Watson veCCC.
Mudunhu reCowdray Park manyoresa VaArthur Mujeyi veZanu PF, Va Pashor Raphael Sibanda CCC, naVaVusumuzi Chirwa veCCC.
KuLobengula-Magwegwe: VaMenziwa Dube Zanu PF, VaEric Gono veCCC
naVaTendai Nyathi CCC.
Mudunhu reMpopoma-Mzilikazi: VaKamamba Dzingai veZanu PF, VaDesmond Makaza veCCC, VaBlessings Sibanda veDOP, VaCharles Moyo veCCC, naVaPardon Tapfumaneyi vakazvimirira.
Mudunhu reNketa: VaAlbert Mavhunga veZanu PF, VaObert Manduna veCCC, VaLuckmore Gwetu veDOP naVaAmbrose Sibindi veCCC.
VaKufahakutizwi vachakweshana zvakare nevari kumirira Zanu PF, VaPedzisai Scott Sakupwanya, avo vavakambokunda muna Nyamavhuvhu pamwe naVaDavid Chitimbe vebato reChangu Chimuti Chapinda Chapinda (CCCC). VaTshabangu havana kuisa munhu achakwikwidza akamirira CCC.
Vakadzingwa vaive meya weMasvingo, Muzvare Shantel Chiwara, vanonzi vakwanisa kuisa mapepa avo ekuti vanoda kukwikwidza zvakare pasi pebato reCCC.
Mutungamiri wenyika, VaEmmerson Mnangagwa, vakatara nhasi sezuva rekunyoresa vari kuda kupinda musarudzo dzekutsiva vanhu vakadzingwa muparamende nemumaknzuru vaVaTshabangu.
Nhengo dzeparamende makumi maviri nina pamwe nemakanzura gumi nemanomwe akadzingwa naVaTshabangu vachiti vanhu ava vakanga vasisakodzeri kuramba vachimirira bato reCCC.
Danho rakaitwa naVaTshabangu rakatambirwa nedare repamusoro nemusi weMugovera.
Forum