Mutungamiri weIsrael, VaBenjamin Netanyahu, varumbidzwa nekumbomisa hondo pakati penyika yavo neHamas kwenguva inosvika maawa mana (4hrs) kuitira kuti pawanikwe mukana wekuti rubatsiro rwechikafu nemishongo rwukwanise kuendeswa kuGaza.
Hofisi inowona nezvekufambiswa kwerubatsiro mugungano reUnited Nations, yeUN Office for the Coordination Of Humanitarian Affairs, inoti zviuru nezviuru zvevanhu vanodarika zviuru makumi mashanu, 50,000 vakafamba nezuro kubva maodzanyemba kweGaza vakananga kuchamhembe kweGaza vachitiza hondo.
Bazi rezvehutano muGaza, iro rinonzi riri kushanda neHamas, iyo inonzi nehurumende yeAmerica chikwata chematororo, rinoti vanhu vashaya muhondo iyi vemuPalestine vave kudarika zviuru gumi nemazana mashanu, kana kuti 10,500.
Israel inotiwo vanhu vashaya muhondo iyi munyika mayo vanodarika chiuru nemazana mana, kana kuti 1, 400.
Zvimwe zvizvarwa zveZimbabwe kusanganisira sangano reAmalgamated Rural Teachers Union Of Zimbabwe nemamwe masangano, zvinoti zvichabatana nemuzinda wePalestine muZimbabwe neMugovera mukuratidzira kusafara nemafambiro ari kuita hondo iyi.
Muongorori wezvematongerwo enyika, VaCalvin Manduna, vanoti danho ratorwa nemutungamiri weIsrael rekumbomisa hondo kwechinguva chidiki kuti vamwe vagari vemuGaza vawane zvikwanisiro idanho rakanaka.
Vanoti nyika dzakadayi seAmerica nesangano reUnited Nations vanofanirwa kuramba vachikurudzira kutaurirana pakati peIsrael neHamas kuitira kuti pave nerunyararo uye kuti hondo ipere.
Forum