Mhuri yenhabvu muZimbabwe iri mukuchema zvichitevera kushaika kwemutambi wenhabvu uye murairidzi ane mukurumbira munyika nekunze kwenyika, Rahman Gumbo, uyo akambotambira Eagles, Highlanders nechikwata chenyika chakaita mukurumbira cheDream Team.
Izvi zviri kuuya panguva iyo Ngezi Patinum Stars yatora mukombe weCastle Lager Premier league Soccer League.
Gumbo, akashaya nezuro manheru ari kuFrancistown, kuBotswana, uko aimborairidza chikwata cheMorupule Wanderers, icho chichangobva kumusiisa basa.
Munguva yake yaive murairidzi, Gumbo akatora mikombe yeligi muZimbabwe neHighlanders pamwe nezvikwata zvekuMalawi nekuBotswana.
Pamusoro pezvo, Gumbo akatambira chikwata chema Warriors chakaita mukurumbira nguva yemurairidzi weku Germany, mushakabvu Reinhard Fabisch, cheDream Team, icho chaive nevatambi vakaita saPeter naAdam Ndlovu, Agent Sawu, Ephraim Chawanda, Francis Shonhayi, naPaul Gundani.
Mukuru wevarairidzi venhabvu muZimbabwe weZimbabwe National Soccer Coaches Association, Beki Nyoni, anoti Zimbabwe yarasikirwa zvikuru nekushaika kwemurairidzi ane mukurumbira uyu.
“Zvinhu zvatirwadza sevarairidzi kuti Rahman ashaya tisina kunzwa kana kurwara kwake. Rahman mutambi akatambira nyika uyezve akarairidza kunze kwenyika zvine mutsindo. Tarwadziwa,”vadaro VaNyonj.
Mutsigiri wemutambo wenhabvu, VaPhillip Regede, vanoti Gumbo akasimudzira nhabvu munyika nekwese kwaakaenda semurairidzi uyezve semutambi.
“Zvinhu zvinotirwadza . Tirikubatikana zvikuru pamoyo. Munhu akabva kure kubva kumaDream Team akazouya kwedu kuCaps United. Tarasikirwa zvikuru munyaya yenhabvu muZimbabwe,” vadaro VaRegede.
Muongorori wemutambo wenhabvu, VaFarai Kambamura, vanoti vatambi vakaita saGumbo vanofanira kuiswa munhoroondo yevatambi vakakoshesesa munyaya dzemitambo, uye vanofanirwa kupiwa ruremekedzo.
”Dai Kuri kunzi ndekunanaAmereka, ndivo vaifanira kuiswa mudzimba dzembiri. Vakasimudza mureza wenyika, vakagadzira mazita,” vadaro VaKambamura.
Sangano reCastle Lager Premier Soccer League raburitsawo mashoko ekuchema Gumbo, richiti mitambo wenhabvu warasikirwa zvakanyanya nekushaya kwake. Hurongwa hwekuchengetedzwa kwake hahusati hwaziviswa.
Zvichakadaro, Ngezi Platinum Stars nhasi yatora mukombe weCastle Lager Premier Soccer League mushure mekurova Simba Bhora 2-1.
Kwasara mitambo miviri chete zvave pachena kuti hapasisina chikwata chinokwanisa kubata kana kudarika Ngezi, iyo yave nemapoinzi makumi matanhatu nematatu.
Kumaruwa eMhondoro-Ngezi, uko kunobva Ngezi Platinum Stars, kune mufaro mukuru sezvo mukombe uyu wanga usati wambosvikako kubvira PSL yavambwa.
Asi mumusha mechikwata cheCranbourne Bullets hamuna mufaro mushure mekunge Cranbourne yaita chikwata chekutanga kubuda muPSL mushure mekunge chaita mangange 0-0 neManica Diamonds.
Sheasham neZPC Kariba dzaita mangange 2-2 mune mutambo wanhasi.
Forum