Mhuri dzine chitsama mumisha yeBudiriro neKuwadzana muHarare dzinonzi dzakasara dzisina pekugara mushure mekunge mafashamu emvura yakanaya usiku hwemusi weChina azadza dzimba dzadzo nekukanganisa midziyo.
Mapurisa akazivisa neChishanu kuti chikwata chinonunura vanhu munjodzi dzemumvura, che sub-aqua unit, chakanunura vanhu vane chitsama kuBudiriro 4, kunzvimbo inonzi Paddock, mushure mekunge dzimba gumi neshanu dzazara nemvura.
Mwana ane makore matanhatu ekuberekwa anofungidzirwa kuti akatorwa nemafashamu aya sezvo asina kuzoonekwa zvakare kubva zvaakadonha kubva kumusna kwamai vake.
Mapurisa anonzi akanunura zvakare dzimwe mhuri gumi nepfumbamwe mumusha weKuwadzana Extension mushure mekunge dzimba dzadzo dzazara nemvura.
Mukuru werimwe sangano rinomirira vagari vemuHarare, reHarare Residents Trust, VaPrecious Shumba, vanoti dambudziko iri riri kukonzerwa nekuti vanhu vave kungobvumidzwa kuvakira dzimba dzavo munzvimbo dzaimbosiiwa dzichinzi dzinofamba nemvura pamwe nemumatoro.
Forum