Munyori mukuru mubazi rezvekuburitswa kwemashoko VaNick Mangwana vanoti madzishe agadzirira kutanga basa rekutaura nevanhu vari mumatunhu eMidlands neMatabeleland nezvenyaya yekupondwa kwakaitwa vanhu vanonzi nevamwe vanodarika zviuru makumi mi maviri munguva yegurukurahundi kumakore ekuma1980.
VaMangwana vanyora padandemutande ravo reX kuti madzishe achatungamira hurongwa uhu akatopihwa zvikwanisiro zvakaita semacomputers.
Mauto eFifth Brigade ndiwo anopomerwa mhosva yekuponda vanhu ava achivapomera mhosva yekuti vainge vapandukira hurumende.
Asi vaive mutungamiri wenyika mushakabvu Robert Mugabe vakazotenda kuti yaive nguva yekupenga.
Mutungamiri wenyika VaEmmerson Mnangagwa ndivo vaive gurukota revasori munguva iyi uye vamwe vanovapomera mhosva yekupesvedzera kupondwa kwevanhu uku kuburikidza nemashoko avo.
Gweta rinorwira kodzero dzevanhu vachishanda nesangano reAll Hands on Justice VaKennedy Masiye vaudza Studio 7 kuti madzishe anofanira kushanda nevemasangano akazvimirira oga sezvo vachionekwa nevamwe sevanorerekera kubato reZanu-PF.
Forum