Bazi rinoona nezvekubatsira vanhu vanenge vawirwa nenjodzi reCivil Protection Unit riri kukurudzira vanhu mumatunhu ose enyika kuti vangwarire mafashamu emvura ayo anonzi atouraya vanhu makumi mashanu nemumwe kubva zvatanga mvura kunaya.
Mukuru weCPU VaNathan Nkomo vanoti hakuna nzvimbo isiri munjodzi yemafashamu nekudaro zvakakosha kuti vanhu vagare vakangwarira.
Vanoona nezvemamiriro ekunze veMeteriological Department vakagara vapa yambiro kuti kuchanaya mvura yakawanda svondo rino kusvika nemusi nemusi weMugovera.
Mvura iyi yakatosiya vamwe vagari vekuBudiriro 4 neMabvuku vasina pekugara uye ikauraya mwana ane makore matanhatu kuBudiriro.
CPU inoti ine dzimba dzekuti vanhu vapotere mumatunhu akasiyana siyana.
Vanoona nezvekufambiswa kwemabasa mune rimwe sangano revagari reCombined Harare Residents Association VaReuben Akili vanoti kuvharika kwemigero uye kuvakira dzimba pasina kukodzera zvawedzera dambudziko remafashamu muHarare.
Forum