Rimwe sangano rinomirira varairidzi, reAmalagamated Rural Teachers Union of Zimbabwe, ARTUZ, rinoti kubva zvavhurwa zvikoro nhengo dzaro hadzisi kushanda nesimba senzira yekuratidza kunyunyuta nemihoro yevarairidzi yarinoti iri pasi zvakanyanya.
Mutungamiri wesangano iri, VaObert Masaraure, vanoti kusashanda kwevarairidzi nesimba uku kuri kuwedzerwawo zvakare nekudzingirwa mari dzezvikoro kuri kuitwa vana vechikoro, izvo zviri kusiya varairidzi vagere vasina zvekuita mune zvimwe zvikoro.
VaMasaraure vanoti varairidzi vari kuda kuti mihoro yavo itangire mumadhora ekuAmerica chiuru nemazana maviri nemakumi matanhatu, kana kuti US$1260.00, pamwedzi, vachiti madhora mazana matatu ekuAmerica avari kutambira pari zvino aparadzwa nemitero yakawanda zvinovasiya vasisina chinhu.
Vanoti nhengo dzavo dzichange dzichiratidzirawo muvhuro wega wega dziri munzvimbo dzinokwirirwa mabhazi vachiti hurumende haisi kuratidza hanya yekugadzirisa zvichemo zvavo, nekudaro vari kuda kuratidza nyika kuti vari kutyaira nyika vakundikana.
Asi mutauriri webazi redzidzo yepasi, VaTaungana Ndoro, varamba mashoko eARTUZ aya ekuti varairidzi havana zvavari kuita muzvikoro, vachiti basa riri kufamba semazuva ose.
VaNdoro vanoti vari kushushikana nekuti Studio 7 iri kuramba ichipa mukana kuARTUZ wekutaura avanoti panyepo iyo isina nhengo dzinodarika shanu dzainomirira.
Forum