Bato rinopikisa reCitizens Coalition for Change rinoti rine hurongwa hwekupikisa mutongo wakapihwa nedare repamusoro wekurambidza dzimwe nhengo dzaro dzedare reparamende nemakunzuru makumi maviri nematatu kukwikwidza musarudzo dzichishandisa zita rekuti Tripple C.
Izvi zvinotevera kuendeswa kwenhengo idzi kumatare nevari kuzviti ndivo vakafanobata chigaro chemunyori mukuru webato iri VaSengezo Tshabangu.
VaTshabangu vari kunzi neCCC havasi nhengo yebato iri vanoti hakuna munhu anokwanisa kukwikwidza wavanenge vasina kutendera.
Asi VaTshabangu vanoramba kuti vari kushanda neZanu-PF. Kunyangwe VaChamisa vakaendawo kumatare vachiti VaTshabangu vasashandise chiso chavo vasina mvumo, matare haasati apa mutongo wavo panyaya iyi.
Mukuzeya nyaya iyi, tabata vaikokera bato reTripple C mudare reparamende, VaAmos Chibaya, avo vakarambidzwawo kukwikwidza. VaChibaya vanoti kurambidzwa kwavo mabasa eZanu-PF.
Sezvo tichitema tisina divi ratinorerekera, tabatawo mukuru mubazi rezvekuburitswa kwemashoko, VaFarai Marapira.
Forum