Mamirioni nemamirioni evanhu mune mamwe matunhu muAmerica pamwe nedunhu reAmerican Samoa, iro riri pasi peAmerica, ari kuvhota musarudzo dze 'Super Tuesday' dzekutsvaka vachamirira Republican Party neDemocratic Party musarudzo yemutungamiri wenyika ichaitwa muna Mbudzi gore rino.
Super Tuesday izuva rinoona matunhu gumi nematanhatu eAmerica achiita sarudzo idzi mukati mezuva rimwe chete.
Zuva reSuper Tuesday rinopa mavhoti, kana kuti madelegates anoita mazana masere nemakumi mashanu nemana (854) kune anenge akunda musarudzo dzebato remaRepublican, ukuwo richipa madelegates anoita chiuru chimwe chete chine mazana mana nemakumi maviri (1,420) kubato reDemocratic Party pazuva reSuper Tuesday chete.
Mutungamiri weAmerica, VaJoe Biden, veDemocratic Party, nevaimbova mutungamiri weAmerica, VaDonald Trump, veRepublican Party, ndivo vanotarisirwa kukunda musarudzo idzi.
Pari zvino, VaDonald Trump vane madelegates mazana maviri ane makumi mana nemana (244) asi vachida chiuru chimwe chete chine mazana maviri ane gumi nemashanu (1,215) kuti vakunde musarudzo dzebato ravo.
Ukuwo VaJoe Biden vane madelegates mazana maviri nematanhatu (206) asi vachida ma"delegates" chiuru chimwe chete chine mazana mapfumbamwe nemakumi matanhatu nemasere (1,968).
Ma delegates aya ndivo vanhu vanozonovhota kumisangano mukuru yemapato avo vachisarudza anozomirira bato roga roga musarudzo.
Blessing Zulu weStudio 7, uyo ari kuona sarudzo idzi dzichiitwa mudunhu reVirginia, anoti vavhoti vaari kuona vanoratidza kuva nechidokwadokwa chekuvhota, achitivo ari kusangana nevanhu vari kuvhoteravo Amai Nikki Haley, vari kukwikwidzana naVaTrump mubato reRepublican.
Muongorori wezvematongerwo enyika achishanda nesanagano reConcerned Citizens Zimbabwe, VaTim Muringai, vanotiwo vanoona VaBiden naVaTrump vari ivo vachadomwa kumirira mapato avo, asi VaTrump mavhoti mashoma paen avari kutarisira musarudzo idzi, izvo vanoti zvinogona kuzovamanikidza kuti vasarudze Amai Nicky Healy kuti vave mutevedzeri wavo musarudzo dzemuna Mbudzi.
Forum