Mutungamiri wesangano reZimbabwe Miners Federation Muzvare Henrietta Rushwaya avo vakasungwa nezuro vachipomerwa mhosva yekuita huori pakutengesa mumwe mugodhi nemari inosvika miriyoni imwe chete kana kuti US$1 million vamiswa pamberi pedare ramejastiriti muHarare nhasi. Muzvare Rushwaya ihama yemutungamiri wenyika VaEmmerson Mnangagwa.
Mejastiriti VaStanford Mambanje vapa Muzvare Rushwaya mukana wekubvisa madhora mazana mashanu semari chibatiso kuti vatongwe vachibva kumba. Vanzi vadzoke kudare musi wa10 Kubvumbi.
Muchuchusi VaLancelot Mutsokoti vange vachipikisa kuti Muzvare Rushwaya vapihwe mukana wekubvisa mari yechibatiso. Muzvare Rushwaya vanonzi vakabira kambani yezvizvarwa zvekukuindia yeNV Group inotungamirwa naVaAshok Jain.
Vanonzi vaiti vaizobatsira kambani iyi kutenga mugodhi kuUmpfurudza kuShamva, Mashonaland Central.
Gore rapera Muzvare Rushwaya vakambobatwawo nemhosva yekuda kubuditsa munyika vachiendesa kuDubai goridhe rinorema makirogiramu matanhatu remari inosvika zviuru mazana matatu nemakumi matatu nematatu kana kuti US$333 000. Vakabhadhariswa mari inosvika zviuru zvishanu chete sefaindi.
Forum