Kunyange hazvo hurumende yaVaEmmerson Mnangagwa iri kuti iri kurwisana nehuwori munyika, vakawanda vanoti huwori huri kutopfunya chisero huchibvira kumusoro kune vakuru vakuru.
Vanoti vanonzi vari kuita zvehuwori havasungwi, kana vakasungwa mangwana vanenge vatove kunze varegererwa.
Huwori hukuru hunonzi huri kuitika mukutengeswa kwezvicherwa, zvakaita semangoda negoridhe kuchitiwo mumapoka ose ehurumende nemakanzuru munyika.
Svondo rino VaMnangagwa vakadoma vaive mutewedzeri wemuchuchisi mukuru wenyika, VaMichael Reza, avo vaimbovewo muchuchisi wekumatare, kuti vatungamire komisheni inorwisana nehuwori, yeZimbabwe Anti-Corruption Commission, ZACC.
VaReza vakatora chigaro chakasiiwa naAmai Loice Matanda-Moyo, avo vave muchuchisi mukuru wenyika, kana kuti Prosecutor General.
Asi kudomwa kwaVaReza rkwasimudza mutauro munyika, vamwe vachiti havana kudomwa pachiteverwa zvinodiwa nebumbiro remitemo yenyika zvekuti basa iri ritange rashambadzwa.
Gweta rinorwira kodzero dzevanhu, VaMarufu Mandewere, vanoti havaoni VaReza vachikwana bhutsu dzakasiiwa naAmai Matanda-Moyo, vachiti Amai Matanda-Moyo munhu ane chiremera.
VaMandewere vanoti VaReza havana zvakare kukodzera kuve pachigaro ichi sezvo vasina hunyanzvi hwekuve gweta kwemakore manomwe inodiwa nemutemo, kana kutanga vashanda semutongi wematare epamusoro eHigh Court neSupreme Court.
Munguva yavo semuchuchisi kumatare, VaReza vanonzi nevamwe vaizivikanwa nekuomesera zvakanyanya vemapato anopikisa kana vanofungidzirwa kuti vanopokana nehurumende, vachivanyima mukana wekubvisa mari dzechibatiso.
Asi gweta vari nhengo yeZanu PF, Doctor Masimba Mavaza, vanoti VaReza ndivo munhu akakodzera pabasa rekurwisana nehuwori vachiti munhu akadzidza zvemutemo ekurwisana nehuwori, nekudaro vane hunyanzvi hwese hunodiwa.
Panyaya yekuti hapana kuteverwa kutemo pakudomwa kwavo naVaMnangagwa, Doctor Mavaza vanoti chiri kudiwa nemutungamiri wenyika kuisa munhu anokodzera kuita basa, kwete zvinodiwa neveruzhinji sezvo veruzhinji vachazofara nezbasa richabatwa.
Mushure mekutambira kudomwa kwavo, VaReza vakazivisa nyika kuti vakakodzera kuita basa iri sezvo vakaita zvidzidzo zvinobata kuteverwa kwepfuma dzakawanikwa nehurowi pamwe nekucheneswa kwemari dzehuwori kuSouth Africa, Botswana neMalawi.
Vakati zviri pamwoyo pavo kuzadzisa tarisiro yeZACC kana kuidarika, Mwari vachida.
Forum