Muchirongwa chedu chemagitare chesvondo rino taita hurukuro nemuimbi wemusambo weR’nB, Rachel Kwainona, remagitare achinzi 'Reichh.'
Rachel musikana ane matarenda ake akawanda anosanganisira kunyora nziyo, kurwira kodzero dzemadzimai, kugadzira zvinyorwa zve digital achishandisa computer, uye mukuru wesangano rinonzi Loud Silence.
Akamboshandawo semutori wenhau kusangano renhau rinonzi 263Chat uye anoona nezvenhau nekufambiswa kwemashoko musangano reArts in Harare.
Rachel akapindawo muzvirongwa zvevechidiki zvinoti CEE Fellowship 2024, YALI RLC 2021, uye Voice2Rep 2023.
Muimbi wematarenda akawanda uyu anoti akatanga kuimba aine makore gumi achiimba pamitambo yematarenda muZimbabwe inosanganisira StarKidz ne Starbrite.
Akazorodza kuAllied Arts muna 2012-2013 uye akatora chinzvimbo chekutanga kwemakore maviri akateedzana semuimbi.
Reichh akatsikisa kambo kake kekutanga kanonzi "Incredible, All Night Long ft George" muna 2012 ari kuchikoro chesekondari.
Akazombobuda munyika achienda kuChina asi muna 2019 adzoka kumusha akasvikobura rumwe rwiyo rwainzi "Hey Mr!" rwuri padandemutande rake re YouTube. Vanoda kunzwa mhanzi dzake vanomuwana padandemutande rake Reichh_zw.
Muna 2022, akazoburitsa dambarefu rake rinonzi "Roses."
Rachel akatsikisazve rimwe dambarefu reVoice2rep muna 2023 rinonzi "Tinoda Ruwoko ft Banshee," akazowedzerazve nekamwe katsva gore rino kanonzi "Ucharamba Uchipisa."
Akapedza zvidzidzo zvepamusorosoro paUniversity of Zimbabwe apo akaita zvidzidzo zve Bachelor of Arts Honours Degree, akazoita zvidzidzo zvimwe zvidzidzo zvinoti diploma re Media and Communications Studies, uye Masters in Multimedia Design Production Systems.
Anotaurawo mutauro wekuChina weMandarin waakadzidzira kuRenmin University muBeijing uye Liaoning University muShenyang kwakare kuChina.
Tinokupai chimwe chirongwa chemagitare nemusi weChishanu svondo rinouya.
Kune vaimbi vanoda kuti titaure navo pachirongwa chedu pano paStudio 7, tibatei paWhatsApp nhamba dzinoti +1 202 465 0318.
Forum