Vamwe vebato rinopikisa hurumende reCitizen's Coalition for Change vanoti danho remutungamiri wenyika, VaEmmerson Mnangagwa, rekudoma komisheni ichange ichiongorora mashandiro ekanzuru yeguta reHarare sedanho rehurumende rekuda kubvuta naro guta iri kubva kubato rinopikisa.
VaMnangagwa vakadoma komisheni yevanhu vashanu iyo ichange ichitungamirwa nevaive mutongi wedare repamusoro vakasiya basa, Justice Maphios Cheda sasachigaro wayo.
Dzimwe nhengo dzekomiti iyi ndaAmai Lucia Gladys Matibenga, vaimbove nhengo yeMDC vazatungamira chimwe chikwata chebato rePDP, VaSteven Chakaipa, VaNorbert Phiri, naAmai Khonzani Ncube.
Komisheni iyi yakapiwa mwedzi mitanhatu yekuita basa rayo paine mukana wekuti nguva iyi inogona kuwedzerwa.
Zvinonzi zvichaferefetwa mumashandiro ekanzuru yeHarare kubva muna 2017 kusvika nhasi zvinosanganisira mabatiro ayo emari dzainowana, kurendeswa kana kutengeswa kwezvivakwa nemidziyo zvekanzuru, kuitwa kwemisangano yekanzuru nezvimwe zvinogona kuonekwa nekomisheni iyi sezvine basa.
Hatina kukwanisa kubata meya veHarare VaJacob Mafume, uye vanga vasati vapindura mibvunzo yedu yatavatumira tisati taenda ppamhepo.
Asi nyanzvi munyaya dzekufambiswa kwemakanzuru vari seneta vebato rinopikisa reCCC, VaSesil Zvidzai, vanoti sekuona kwavo danho remutungamiri wenyika iri idanho rehurumende rekuda kubvuta naro kanzuru iyi.
VaZvidzai vanoti kubva 2017 makanzuru anga achishanda nemakurukota ehurumende, zvichireva kuti kana makanzuru aya anga achitadza basa, ongororo iyi inofanirwa kutangira kumakurukota aya.
Vanotiwo zviri pachena kuti makanzuru ari kutadziswa kuita basa nemazvo nekuda kwekupindira kwehurumende, kutorwa kwemari nehurumende inofanirwa kunge ichigadziriswa migwagwa nemakanzuru nezvimwe zvakawanda.
Forum