Vateveri vemutambo wenhabvu vatarisina nemabiko emitambo musvondo iro Zimbabwe yave nemurairidzi mutsva panguva imwecheteyo murairidzi wechikwatc cheDynamos, Genesis Mangombe, apinda panguva yakaoma.
Svondo rino kwakabaka moto apo chikwata chiri kupisa cheSimba Bhora chiri kushanyira Caps United muRufaro Stadium musi uyo Dynamos yakananga kuMandava Stadium kunosangana neFC Platinum mumitambo iriko mangwana.
Simba Bhora iri kupisa ichirairidzwa naTonderai Ndiraya, uyo akadzingwa basa kuDynamos asi kuDembare kwacho vari kuchema vachisheedzera kuti murairidzi wavanaye, Genesis Mangombe, ngaasiiswe basa.
Simba Bhora iri pachinhanho chechishanu, mapoinzi mashanu pasi peManica Diamonds, iyo iri kutungamira gungano iri.
Asi Ndiraya anoti vari kuda kurova Caps United kuti vadimbure hutungamiri hweManica Diamonds uhu.
"Mutambo watakatarisana nawo watichatamba musi weSvondo, tichaedza nepatinokwanisa kuti titambe tifadze vanhu, kunyanya vanotitsigira," anodaro Ndiraya.
Asi murairidzi weManica Diamonds, Jairosi Tapera, ari kuda kuratidza kuti veZIFA Normalisation Committee havana kukanganisa pakumupa basa rekurairidza chikwata chemaWarriors nekurova Hwange muSakubva Stadium mangwana akare.
Tapera neChishanu akapihwa neZIFA basa rekufanorairidza chikwata chemaWarriors kwemitambo mishoma izvo muongorori wemutambo wenhabvu, VaNazzy Moyo, vanoti idanho rinofadza.
"Danho ratorwa idanho rakanaka chose. Rapawo mukana kune avo vasati vapihwawo mukana toona zvavanokwanisa kuita. Totarisa zvikwata zvavo zviri kutamba zvakanaka. Nekudaro handione chakaipa mukusarudzwa kwavo," vari kufara VaMoyo.
Tapera achange achibatsirwa naTakesure Chiragwi naSaul Chaminuka, Sunday Chidzambwa ari chipangamazano.
Asi Mangombe ari pakasiyana naTapera zvekuti anofanira kunokunda kana zvatoomesesa kuita mangange kuFC Platinum kuti zvinhu zvake zvigadzikane.
Pamutambo neArenel Movers pakati pesvondo rino vatsigiri vechikwata cheDembare vaiimba kuti ngaadzingwe basa kunyange zvazvo iye akakunda.
Mutsigiri wechikwata ichi, VaLawson Mutyambizi, vanoti Mangombe ngaagadzirise chikwata chavo nechimbi-chimbi.
"Murairidzi anofanira kusimudza masitokononzi ake kugadzirisa chikwata. Chinoda kugadziriswa zvakasimba," vari kuchema VaMutyambizi.
Mimwe mitambo yeCastle Lager Premier Soccer League yatambwa neMugovera yapera seizvi...
Chicken Inn 0 Chegutu Pirates 0
Bikita Minerals 0 Ngezi Platinum 2
ZPC Kariba 1 Yadah 0
Herentals 2 TelOne 1
Mimwe mitambo iriko neSvondo yakamirawo seizvi...
Greenfuel v Highlanders
Arenel v Bulawayo Chiefs.
Zvichakadaro, mhuri yeaive mutevedzeri wemurairidzi wechikwata cheCaps United, Nelson Matongorere, yazivisa kuti Matongorere acharadzikwa kumarinda eZororo Cemetery Park neMuvhuro nenguva dza 2 masikati.
Matongorere, uyo aimbove mukuru wevarairidzi venhabvu muZIFA uyezve akamborairidza maMighty Warriors nemaYoung Warriors akashaika nemusi weChitatu svondo rino ave nemakore makumi matanhatu nemasere ekuberekwa.
Forum