Nhengo shanu dzesangano reNational Democratic Working Group, NDWG, iro rinotungamirwa naVaJob Sikhala dzakasungwa mumusha weKuwadzana Extension muHarare neMugovera dzaburitswa muhusungwa neSvondo mushure mekubhadhariswa mari dzemafaindi dzinoita madhora makumi matatu ekuAmerica pamunhu.
Nhengo idzi dzarara kuchitokisi chemapurisa mushue mekasungwa dzichinzi dzaiita musangano dzisina mvumo yemapurisa nechinangwa chekuda kutyora mutemo wenyika.
Vasungwa ava vakazoendeswa kudivi reLaw and Order kuHarare Central Police Station uko vakanopomerwa mhosva yekuita zvemusarinya, kana kuti Criminal Nuisance.
Mumwe vashanu ava, VaEdmore Svinurai, vanoti havana zvavo kushungurudzwa pavaive mumaoko emapurisa kunze kwekuti pavakabva pakamba yeHarare Central nezuro manheru vachidzoserwa kuKuwadzana vakanoudzwa kuti bhuku rekuti vakwanise kubhadhara mafaindi rakanga risiri kuoneka, izvo zvakazoita kuti varare vari muhusungwa.
Hurumende yakatoyambira kare veruzhinji kuti vasatyora mutemo ichiti yakagadzirira kuranga zvakasimba vose vachawanikwa vari kune rimwe divi remutemo.
Forum