Chikwata cheHighlanders chiri murufaro mushure mekurova Dynamos pamusha payo mumutambo watambirwa muRufaro Stadium, musi uyo kuine fainari yeEuro 2024 pakati peEngland neSpain.
Mumusha weHighlanders hamusi kudaidzwa anonzwa mushure mekunge Bosso yarova Dynamos 2-0 munhandare yeRufaro nhasi masikati ndokutora mapoinzi ese ari matatu.
Aka kave kechipiri mwaka uno Highlanders ichirova Dembare mumitambo yeligi mushure mekuikunda 1-0 mumutambo wekutanga.
Kukunda uku kwapinza Highlanders mumapoinzi makumi maviri nemapfumbamwe asi iri pachinhanho chechishanu pasi peFC Platinum, Ngezi, Simba Bhora, neManica Diamonds.
Highlanders ine mapoinzi mapfumbamwe pasi peFC Platinum iyo iri kutungamira gungano iri nemapoinzi makumi matatu nemasere.
FC Platinum yacho yasimbisa hutungamiri hwayo mushure mekurova Chegutu Pirates 3-1 muBaobab Stadium nhasi masikati zvekare.
Kugona Kunenge Kudada yasiya Ngezi Platinum Stars neSimba Bhora nemapoinzi mashanu uyezve Manica Diamonds nemapoinzi matanhatu.
Asi murairidzi weFC Platinum Norman Mapeza anoti rwendo rwuchiripo.
"Irwendoka urwu kuti tikaita izvi tinofanira kuti tisvike patiri kuda kuti tisvike. Kuti ndibve muHarare kuenda kuBulawayo ndinofanira kukwira michovha mishanu. Asi ndinofanira kusvika Bulawayo," adaro Mapeza.
Ngezi, Simba Bhora, neManica Diamonds dzakatamba mitambo yadzo nezuro.
Mumwe mutambo watambwa wapera wakati Chicken Inn 0 Caps United 0. Mimwe Mitambo yakatambwa neMugovera.
Asi manheru ano kune mutambo mukuru wefainari yeEuro 2024 pakati peSpain neEngland, uyo uri kutarisirwa zvakanyanya nevanotevera nhabvu munyika.
Kunyange hazvo Spain yanga ichitamba zvinodakadza munzira yekusvika mufainari, chaunga muZimbabwe chinoti England ndiyo iri kutora mukombe uyu.
Sherman Muswera, uyo aimbotambira Black Rhinos, anoti ari kuisa mari yake pama “Three Lions” eEngland nekuti anga achiwedzera mwando pamutambo wawo wega-wega waanga achitamba.
"Mutambo uyu wakaomarara. England kwayakabva yaitatarika asi zvavepo ndezvekuti ma players eSpain vadiki. England inopedza ne experience. England iri kukunda pasina extra time," anodaro Muswera.
Mumwe muteweri wenhabvu, VaDarlington Chifamba, vanoti England iri kutora mukombe nemhaka yevatambi vayo avo vagara nguva yakati rebeyi vachitamba vari pamwechete.
"Ini pachangu ndiri kuona kuti England inopedza nekutora mukombe. Spain ichiri nevana vadiki vachiri kure nekurwira kutora mukombe mukuru wakadai," ndiwo maonero aVaChifamba.
Murwendo rwayo rwekusvika mufainari umu, Spain yakarova France 2-1 mumasemifainari ukuwo England ichibuditsa Netherlands 2-1 zvekare.
Aimbove mubati wepagedhe weKambuzuma United neFalhorn, Shepard Saizi, anoti England yatarisana nekunyora peji idzwa munhoroondo yemakundano aya.
"Ndiri kuona Spain ichirohwa nekuti England irikuda nhoroondo yekutora mukombe kwafamba nguva ndefu ",anofembera Saizi.
Asi aimbotambira Caps United neZimbabwe, Alois Bunjira, anoti mutambo uyu wakaoma zvekuti mukombe unokwanisa kuenda kwese-kwese.
Italy ndiyo yakatora mukombe uyu muna 2020 mushure mekurova England 3-2 mumapenareti.
Spain yatora mukombe uyu katatu, muna 1964, 2008 na 2012. England haisa yambotora mukombe uyu kunze kwekupinda mufainari kamwe chete muna 2020.
Forum