Sangano reZimbabwe Olympics Committee (ZOC) rinoti riri kufadzwa nemafambiro akaita makwikwi eOlympics achangobva kupera kuParis guta guru reFrance, kunyangwe hazvo pasina wekuZimbabwe akakwanisa kutora menduru pavakwikwidzi vakange vakamirira nyika.
Vanga vachitungamira chikwata cheZimbabwe kumakwikwi vakamirira Zimbabwe Olympics Committee, VaRingisai Mapondera, vanoti sesangano vane zvizhinji zvavakadzidza kubva makwikwi aya pamusoro pekukoshesa gadziriro yevanokwikwidza uye kukosha kwerutsigiro rwunobva kuhurumende nemakambani akazvimirira.
Zimbabwe yainge iine vakwikwidzi mumitambo inoti yekutuhwina, yekushambira nehwato kana kuti rowing, nekumhanya.
VaMapondera vanoti vakafadzwa nekupinda kwakaita vamhanyi vemujahwo we200 meters, Makanakaishe Charamba naTapiwa Makarawu, mufainari yemujahwo uyu sezvo zvisati zvamboitika kuti vamhanyi vemunyika vaviri vapinde mufainari yakadayi.
Vanoti pari zvino vari mushishi kurongedza kuti vadzokere kumusha vamwe vakwikwidzi vachidzokera kunyika dzavanogara nekugadzirira mamwe makwikwi akadayi.
"Shuwiro yedu ndeyekuti pawanikwe mushandirapamwe pakati pehurumende, makambani nemasangano anomirira mitambo munyika kuti tigozowana mukana wekuti vanenge vane chipo chekugona mitambo vachida kuzoendawo kumaOlympics anotevera vawane mukana uyu munyika," VaMapondera vaudza Studio7.
Forum