Mhemberero iri kuenderera mberi mumusha weDynamos mushure mekunge chikwata chine mukurumbira ichi chabudirira kuenda mberi nebhora mumakundano e CAF Confederations Cup umo chiri kumirira Zimbabwe.
Kwese kwese vatsigiri venhabvu vari kutaura nezvakaitwa neDynamos apo yakashanya kuZambia nezuro ndokunoita mangange 0-0 nechikwata cheZESCO, izvo zvakasiya DeMbare ichipinda mumchikamu chepiri chekurwira chinzvimbo mumakwikwi emuAfrica aya
Mudzimba, mudzinzira nemunzvimbo dzekutandarira nyaya ndeyekuti Dembare yakazviita mushure mekunge veruzhinji vati chikwata ichi chakarohwa kare mutambo usati watambwa.
Asi sezvakamboitika muna 1998, Dynamos yakamuka chibhebhenenga ndokuita mangange 0-0 nekuenderera mberi mushure mekukunda 1-0 mumutambo wekutanga.
Dynamos iri kuenderera mberi mushure mekukunda 1-0 mumitambo miviri.
Mutsigiri weDynamos, VaTinwell Tanyara, vanoti vari kufara nekubudirira kwakaita chikwata Chavo.
"Ndizvo zvinhu zvinondinakidza izvozvi. Kana Dynamos ikakunda, moyo wangu unonzwa kusununguka zvisingaite," vanodaro VaTanyara.
Dynamos yave kusangana neOrapa yekuBotswana munharaunda inotevera ye Second Preliminary Round Leg 1 yemitambo maviri.
Uyu mutambo wechitatu waLloyd Chigove semurairidzi weDynamos mushure mekutsiva Genesis Mangombe uyo akaenda kuScottland Football Club.
Chigove akaita mangange neSimba Bhora mumutambo wake wekutanga, ndokurova ZESCO 1-0 mumutambo wwake wechipiru uyo Dembare yakatambira kuBotswana.
Asi muZimbabwe, Simba Bhora yatora hutungamiri hweCastle Lager Premier Soccer League mushure mekunge FC Platinum, iyo iri kukwikwidzana nay, yarohwa 1-0 neBikita Minerals.
Simba Bhora yave nemapoinzi makumi mana nemanomwe, FC Platinum iine mapoinzi makumi mana nemashanu.
Highlanders iri kutevera nemapoinzi makumi matatu nemasere.
Murairidzi weSimba Bhora, Tonderai Ndiraya, anoti chinangwa chavo ndechekutora mukombe wePSL nekufadza vatsigiri vavo.
"Tichaedza nepatinokwanisa kuti titambe, tifadze vanhu, kunyanya vanotitsigira," anodaro Ndiraya.
Mimwe mitambo yatambwa neSvondoi yapera seizvi, Caps United 1 Manica Diamonds 0, Chicken In 0 Highlanders 0, Chegutu 0 Yadah 2.
Mitambo yakatambwa neMugovera yakapera yakati Simba Bhora 1 Byo Chiefs 0,
Herentals 2, Greenfuel 1, Arenel 0 ZPC Kariba 1.
Zvichakadaro, chikwata cheZimbabwe chevakaremara chiri kunokwikwidza ku 2024Paralympic Games chasimuka muHarare nhasi chakananga kuParis, France, kumakundano aya.
Chikwata ichi chine vamhanyi vaviri venzendo pfupi, Tinotenda Bango naKudakwashe Chigwedere avo vari kurairidzwa naElliot Mujaji.
Mujaji, uyo akatora menduru yegoridhe kumakundano mamwechetewo anoti ari kutarisira kuti chikwata chake chichaunza mufaro munyika.
Bango ari kupinda munhandare musi wa 30 Nyamavhuvhu, achizoteverwawo naChigwedere uyo ari kumhanya musi wa 3 Gunyana.
Makundano e 2024 Paralympic Games ari kutanga musi wa 28 Nyamavhuvhu achipera musi wa 3 Gunyana.
Forum