Mauto eIsrael anoti Iran yakanda zvombo zvehondo zvakawanda muIsrael neChipiri senzira yekutsividza kurwisa kuri kuita Israel chikwata cheHezbollah chemuLebanon chainodyidzana nacho.
Mumwe mukuru mukuru muhurumende yeAmerica ambenge ayambira kuti Iran iri kugadzirira zvakasimba kukanda zvombo zvemuchadenga ichirwisa Israel akayambira nezvenjodzi inogona kuitika kana kurwisa uku kwakaitika achiti America iri kutsigira zvakasimba gadziriro yekudzivirira Israel.
Mabhero ekuyambira veruzhinji nezvenjodzi yekurwiswa nemuchadenga arira nyika yose muIsrael apo kuputika kwezvombo kwanzwikwa muJerusalem nemunhika yerwizi Jordan mushure mekunge zvizvarwa zveIsarel zvahwanda munzvimbo dzekuzvidzivirira kubva kumabhambu.
Vatori venhau venhepfenyuro yeterevhizheni yehurumende varara pasi nematumbu apo vanga vari pamhepo.
Nhepfenyuro yemauto eIsrael yati zvombo zvemuchadenga zvingada kusvika kumazana maviri zvakandwa zvichipinda muIsrael kubva kuIran.
Mauto eIran Revolutionary Guards ati Iran yakanda makumi ezvombo kuIsrael, achiti kana Israel yakadzosera mhinduro yeTehran inenge iri yekuparadza.
Mauto eIsrael azozivisa kuti zvinhu zvagadzikana achiti vanhu vanga vave kukwanisa zvavo kubuda munzvimbo dzavanga vakawanda.
Mutauriri wemauto eIsrael, Daniel Hagari, ati mauto anga asina ruzivo kana panga paine vakuwara zvichitevera kurwiswa neIran uku.
Atsanangura kurwiswa uku sechinhu chakakomba achiti Iran yazvigokera moto muziso.
Mumwe mukuru muhurumende yeIran audza sangano renhau reReuters kuti mvumo yekukanda zvombo kuIsrael yabva kumutungamiri mukuru Ayatollah Ali Khamenei.
Ati Khamenei aramba ari munzvimbo yakachengetedzeka.
Vatori venhau veReuters vaona zvombo zvichibatwa nezvombo zveIsrael zvinokwanisa kubata zvombo zvichiri muchadenga.
Mitengo yemafuta yakwira nezvikamu zvishanu kubva muzana pabuda mashoko ekuti Iran yakanda zvombo muIsarel, izvo zvinogona kusiudza hondo pakati penyika dzinove Makara asionani idzi. (VOA/Reuters)
Forum