Mutungamiri wenyika VaEmmerson Mnangagwa vabatana nevamwe vatungamiri venyika nedzihurumende dzapasi rose mukukorokotedza VaDonald Trump nekukunda kwavakaita musarudzo yemutungamiri wenyika yakaitwa muAmerica neChipiri.
Vachinyora padandemutande re ‘X’ iro raimbonzi Twitter, VaMnangagwa vati vakagadzirira kushanda naVaTrump mukuunza runyararo pasi rose.
VaMnangagwa nevamwe vanhu gumi vakatemerwa zvirango neAmerica vachipomerwa mhosva yekutonga nedemo pamwe nekuita huori kunyange havo ivo vari kuramba zvipomerwa izvi.
Mutungamiri wehurumende yeIsrael, VaBenjamin Netanyahu ndemumwe wevatungamiri venyika dzinodyidzana neAmerica vatanga kutumira mashoko ekutsigira, vachirumbidza kudzoka kwaVaTrump muhofisi, uko vati kunopa kuzvipira kwakasimba kwekudyidzana kwakakosha kuri pakati peIsrael neAmerica.
Mutungamiri weUkraine, VaVolodymyr Zelenskyy, avo vakakurudzira rutsigiro rwakawanda kubva kuAmerica nenyika dzekumawirira kuitira kurwisana nekupinda kweRussia munyika mavo, vati uhu ndiho hurongwa hunokwanisa kuunza runyararo muUkraine vachiti vane tarisiro yekuti vachazvikwanisa vachishanda pamwechete.
Mutungamiri weRussia VaVladimir Putin vanga vasati vaburitsa mashoko avo ari pamusoro pesarudzo dzemuAmerica idzi.
Mukuru weNATO, sangano rinodyidzana neAmerica iro ragara richishoropodzwa naVaTrump vachiti harisi kuita zvikuru mukudzivirira Europe, vatumirawo mashoko ekukorotedza.
Mutungamiri wehurumende yeBritain, VaKeir Starmer vati hurumende yavo inomira neAmerica mukudzivirirwa kwerusununguko, hutongo hwejekerere nebudiriro.
Mutungamiri weEuropean Union, Amai Ursula von der Leyen, vakati vanokorokotedza VaTrump vakapembedza hukama huri pakati peEuropean Union neAmerica.
Vamwe vatungamiri vatumira mashoko vanosanganisira mutungamiri wePhilppines VaFerdinand Marcos Jr, mutungamiri weJapan VaShigeru Ishiba, mutungamiri wehurumende yeIndia VaNarendra Modi, pamwe nemutungamiri weSouth Korea VaYoon Suk Yeol.
Mutauriri webazi rezvekudyidzana nedzimwe nyika muChina ati Beijing icharamba ichibata hukama hweChina neAmerica vachishandisa kudyidzana nekushanda pamwe kwagara kuripo kare.
Vamwe vanoongorora zvematongerwo enyika pamwe nekudyidzana nedzimwe nyika vachidzidzisa paDevry University kuOhio muAmerica, Muzviinafundo Elliot Masocha, vanoti VaTrump vanogona kuramba vachifamba negwara ravo rekutungamidza America kutanga.
Muzvinafundo Masocha vanoti vatungamiri venyika dzapasi rino vanotofanirwa kukorokotedza VaTrump zvisinei nekuti vatungamiri ava vanowirirana navo here kana kuti kwete.
Asi vamwe vanoti VaTrump pavaive mutungamiri wenyika kubva muna 2016 kusvika muna 2020 gwara iri rakaita kuti hukama hwenyika yavo nedzimwe nyika dzainodyidzana nadzo pamwe nedzaisingadyidzane nadzo husagadzikana zvakanaka.
Forum