Mashoko anotevera anoratidza maonero ehurumende yeAmerica.
America inoshoropodza kusungwa nekukandwa mumajeri zvisina tsarukano nehurumende yePeople’s Republic of China kwevarwiri vekodzero dzevanhu vane mukurumbira, Va Yu Wensheng nemudzimai wavo, Amai Xu Yan.
Musi wa 29 Gumiguru, dare redzimhosva muSuzhou rakapa mitongo yemakore matatu kuna VaYu negore rimwechete nemwedzi mipfumbamwe kuna Amai Xu, mushure mekuvawana vaine iri kunzi mhosva yekupesvedzera “kupandukirwa kwehurumende.”
Mugwaro ravakaburitsa, mutauriri webazi rezvekudyidzana nedzimwe nyika muAmerica, VaMatthew Miller vakati, “Mitongo iyi inoratidza kuenderera mberi kweChina mukuedza kwayo kunyaradza avo vanotaura pamusoro pekodzero dzevanhu nekuteverwa kwemutemo."
European Union, pamwe nemapazi ekudyidzana nedzimwe nyika eFrance neGermany, vakashoropodzawo mutongo wakapiwa Va Yu Wensheng naAmai Xu Yan vakakurudzira kuti vaburitswe muhusungwa nekukasika.
VaYu naAmai Xu vakasungwa muna Kubvumbi 2023 apo vaive munzira kuenda kumusangano nevakuru vakuru veEuropean Union kuBeijing.
Mumashure umo, sezviri mugwaro rakaburitswa nebazi rezvekudyidzana nedzimwe nyika muAmerica muna 2023 riri pamusoro pekodzero dzevanhu muPeople’s Republic of China, VaYu vakaburitswa mujeri muna 2022 mushure mekupika makore mana nekuda kwekurwira kodzero kwavanoita.
Vakanga varwira kodzero dzemamwe magweta akanga asungwa nekutongwa pasi pechirongwa chainzi “709” chakaitwa muna 2015, apo hurumende yeChina yakasunga magweta nevanorwira kodzero dzevanhu vanodarika mazana maviri.
Mudzimai waVaYu, Amai Xu, vaivevo munhu airwisa zvakasimba kuti murume wavo aburitswe muhusungwa.
VaMiller vakasimbisa kuti pakutongwa kwevaviri ava muna 2024 muSuzhou, hurumende yakarambidza vekumizinda yenyika dzakawanda kusanganisira vekumuzinda weAmerica kuti vange vari mudare, izvo zvakadzikisira pasi kutongwa kuri pachena kunove kwakaosha mukuona kuti kodzero dzaVaYu naAmai Xu dzekuti vatongwe zviri pachena dzateverwa.
VaMiller vakati America inokurudzira People’s Republic of China kuti, iregerere izvozvi VaYu naAmai Xu pasina zviga zvinotarwa.
Vakati vanotsinhira chikumbiro chavo chekuti China iregerere vose vakaiswa mumajeri vasina mhosva dzavakapara.
VaMiller vakapika kuti, "America inoramba ichimira neavo vane hushingi hwekurwira kodzero dzevanhu mu People’s Republic of China nemupasi rose.”
Ayo anga ari mashoko anoratidza maonero ehurumende yeAmerica
Forum