Mutevedzeri wameya weguta reBulawayo VaEdwin Ndlovu nasachigaro wekomiti yezvemari VaMpumelelo Moyo vakasungwa neZACC vachipomerwa mhosva dzekuita zvehuori.
ZACC inoti vaida mari yechioko muhomwe inosvika zviuru makumi maviri zvemadhora-US20, 000 kubva kukambani yeLabenmon Investment yaida kupihwa basa nekanzuru.
Vaviri ava vakasungwa mushure mekutambira mari yechioko muhomwe iyi.
Kambani yekuChina yeLebenmon Investment iri kuda rezinesi rekuti ikwanise kuvhura fekitari inogadzira simende kuCowdray Park muBulawayo.
Hatisati takwanisa kubata magweta evaviri ava kuti tinzwe divi ravo. Asi meya weBulawayo VaDavid Coltart vatenda kuti vaviri ava vasungwa.
Forum