Chikafu chakapihwa vakaremara nemudzimai wemutungamiri wenyika Amai Auxillia Mnangagwa kuBikita chinonzi chakabiwa nemumwe mutungamiri webato reZanu-PF zvokonzera mutauro wakanyanya munzvimbo iyi.
Sachigaro weZanu PF District Coordinating Committee (DCC), VaNgoni Taruwona ndivo vari kupomerwa mhosva yekuba mupunga uyu. VaTaruwona vari kunzi vakasweresa vakaremara vakamira panzvimbo inogoverwa chikafu.
VaTaruwona vakaramba kutaura neStudio 7 nezvenyaya iyi sezvo vakadzima nhare mushure mekufonerwa uye havana kupindura mibvunzo yatakavatumira paWhatsApp.
Mumwe mugari wekwaNyika, VaTinarwo Macheke avo vakaremara gumbo vanoti vakafambira dhongi rakaora. Vaudza Studio 7 kuti, “Rice rakauya naMai First Lady richifanira kupihwa isu vakaremara asi hatina kuzoriwana rice iroro." Vaenderera mberi vachiti, "Takanzwa kuti rakazotorwa nevamwe vakuru vebato isu hatina kuzowana kana 500 grams”
Mufaro wekuti vawanirwa Nyasha naAmai Mnangagwa wakakurumidza kupera sedova kuna VaTaurai Mafuka, vekwaChikuku.
Vati, “Tapakapedza zuva rese takamiriri tichifara kuti Mai venyika vatirangarirawo nechikafu isu vakaremara asi hapana chakauya takazongonzwa kuti chakatorwa nevatungamiriri vebato muBikita”
Nyayay yekubiwa kwemupunga iyi iri kutsviriridzazwo pamadandemutande evatsigiri veZanu-PF akaita seWhatsApp.
Murongi wemabasa muZanu PF muBikita, VaKudakwashe Gopo, vakatumira mashoko paWhatsApp vachishoropodza sachigaro wavo uye vachivakurudzira kuti vadzose mupunga wavakatora. Vanoti, “The only option ndeyekuti VaTaruona vadzose rice ten bags dzavakatora then leadership yoona kuti dzopuwa sei vakaremara ndozvega zvinoita kuti tifambe zvakanaka musangano wedu wakabatana we cannot pretend kuda musangano tichida kuwana kubira vanhu”
VaGopo vaudza Studio 7 kuti ndivo vakatumira mashoko aya. Mutauriri weZanu PF muMasvingo, VaPepukai Chiwewe, vati nyaya iyi haisati yamhan’arwa kubato ravo asi vanoti havakurudziri huori.
Vati, “Semusangano weZanu PF hatisati tawana report yekubiwa kwemupunga kubva kuBikita saka hatigoni kupa huchapupu. Vatiwo, "Asi sebato hatikurudziri humbavha nehuori, vanenge vaita izvozvo vanofanira kusungwa”
Vanorwirwa kodzero dzevakaremara, musangano reDisability Amalgamation Community Trust (DACT), VaHenry Chivhanga, vanoti vanhu ava vanofanira kusungwa.
“Hazvina kunaka zvakaitwa nemutungamiriri iyeye weZanu PF kuBikita kubira vanhu vane hurema."Vatizve, "Dai Mwari vakavarova neshamu vakwangwaye, veduwe regai zvinhu zvevakaremara kana vapuwa vagovane”
Vakafanobata chigaro chemutauriri wemapurisa mudunhu reMasvingo, Assistant Inspector, Masauso Patinhu, vati nyaya iyi haisati yamhan’arwa.
Nyaya dzekubiwa kwechikafu chekubatsira vanotambura munguva yenzara dziri kuramba dzichiwanda muMasvingo. Muna Chikumi, vamwe vatungamiriri veZanu PF nemapurisa vakasungwa vaba chibage chekubatsira vagari vemumaruwa ekwaBhasera kuGutu East.
Forum